ԿԱՅԱՑԵԼ Է ՌԴ ԵՎ ԻԻՀ ԱԳ ՆԱԽԱՐԱՐՆԵՐԻ ՀԵՌԱԽՈՍԱԶՐՈՒՅՑԸ
Ռուսաստանի և Իրանի արտաքին գործերի նախարարներ Սերգեյ Լավրովը և Հոսեյն Ամիր Աբդոլլահիանը հեռախոսազրույց են ունեցել, որի շրջանակում քննարկել են երկկողմ հարաբերությունները, ինչպես նաև անդրադարձել տարածաշրջանային զարգացումներին:
Լավրովը ողջունել է «3+3» ձևաչափով հերթական հանդիպումն Իրանում անցկացնելու առաջարկը և հույս հայտնել, որ այն կնպաստի տարածաշրջանում կայունությանն ու անվտանգությանը: Իրանի ԱԳ նախարարն իր հերթին «3+3» ձևաչափով առաջիկա հանդիպումը որակել է տարածաշրջանային համագործակցությունը խորացնելու հնարավորություն:
Կողմերը քննարկել են նաև Իրանի միջուկային ծրագրի վերաբերյալ Գործողությունների համատեղ համապարփակ ծրագրի լիարժեք իրագործման վերականգնման հարցը և Ուկրաինայի շուրջ ստեղծված իրավիճակը:
ԴՈՆԵՑԿՆ ՈՒ ԼՈՒԳԱՆՍԿԸ ՃԱՆԱՉԵԼՈՒ ԴԻՄՈՒՄ՝ ՌԴ ՆԱԽԱԳԱՀԻՆ
ՌԴ Պետդուման հավանություն է տվել Դոնեցկի և Լուգանսկի Ժողովրդական Հանրապետությունները ճանաչելու անհրաժեշտության մասին դիմումը ՌԴ նախագահին ուղարկելու նախագծին։ Կոմունիստական կուսակցության հեղինակած նախագծին կողմ է քվեարկել 351 պատգամավոր:
Խորհրդարանի ստորին պալատի խոսնակ Վյաչեսլավ Վոլոդինի խոսքով՝ Դոնեցկի և Լուգանսկի ճանաչումը հիմքեր կստեղծի անվտանգության երաշխիքների ապահովման և հանրապետությունների բնակիչներին արտաքին սպառնալիքներից պաշտպանելու, ինչպես նաև միջազգային խաղաղության և տարածաշրջանային կայունության ամրապնդման համար:
ՍՏՈԼՏԵՆԲԵՐԳՆ ՈՒ ԱԼԻԵՎԸ ՔՆՆԱՐԿԵԼ ԵՆ ՏԱՐԱԾԱՇՐՋԱՆԻ ԶԱՐԳԱՑՈՒՄՆԵՐԸ
ՆԱՏՕ-ի գլխավոր քարտուղար Ենս Ստոլտենբերգը հեռախոսազրույց է ունեցել Ադրբեջանի նախագահ Իլհամ Ալիևի հետ: Կողմերը քննարկել են տարածաշրջանային զարգացումները, Ուկրաինայում ստեղծված իրավիճակը, ինչպես նաև երկրի շուրջ վերջին զարգացումների ազդեցությունը էներգետիկ շուկաների ու Եվրոպա գազի մատակարարման վրա։
Ստոլտենբերգը շնորհակալություն է հայտնել Ադրբեջանին՝ «գազի մատակարարումների ծավալի ավելացման և Եվրոպայի համար էներգետիկ ռեսուրսների հուսալի մատակարար լինելու համար»:
ԱՊՀ-Ն ԱԿՆԿԱԼՈՒՄ Է ԴԻՏՈՐԴԻ ԿԱՐԳԱՎԻՃԱԿ ՍՏԱՆԱԼ ՀԱՊԿ-ՈՒՄ
ԱՊՀ-ն ակնկալում է դիտորդի կարգավիճակ ստանալ Հավաքական անվտանգության պայմանագրի կազմակերպությունում: Այս մասին հայտնել է ԱՊՀ գործադիր կոմիտեի նախագահի առաջին տեղակալ Լեոնիդ Անֆիմովը։ Հարցը կքննարկվի մշտական ներկայացուցիչների խորհրդի նիստում՝ փակ ռեժիմով, հավելել է նա։
Անֆիմովի խոսքով՝ փետրվարի 15-ին մշտական ներկայացուցիչների խորհրդի նիստում կքննարկվեն նաև ԱՊՀ կառավարությունների ղեկավարների խորհրդի նիստի օրակարգի ձևավորման առաջարկները, որը նախատեսվում է անցկացնել մայիսին Նուր Սուլթանում:
ԹՈՒՐՔԻԱՆ ԵՎ ԱՄԷ-Ն 13 ՀԱՄԱՁԱՅՆԱԳԻՐ ԵՆ ՍՏՈՐԱԳՐԵԼ
Թուրքիայի նախագահ Ռեջեփ Էրդողանի՝ Արաբական Միացյալ Էմիրություններ երկօրյա պաշտոնական այցի շրջանակում ստորագրվել է 13 համաձայնագիր: Դրանք վերաբերում են պաշտպանության, առողջապահության, կլիմայի փոփոխության, արդյունաբերության, տեխնոլոգիաների, տնտեսության, մշակույթի, գյուղատնտեսության, տրանսպորտի, տարերային աղետների դեմ պայքարի և այլ ոլորտներում գործակցության զարգացմանը:
Էրդողանը, որը 2012 թվականից ի վեր առաջին անգամ է այցելում ԱՄԷ, հայտարարել է, որ երկրների երկկողմ հարաբերություններում նոր դարաշրջան է սկսվել։
ՎԻԵՆՆԱՅԻ ԲԱՆԱԿՑՈՒԹՅՈՒՆՆԵՐՆ ԱՎԱՐՏԱԿԱՆ ՓՈՒԼՈՒՄ ԵՆ. ՓՐԱՅՍ
Վիեննայում Իրանի և Մեծ հնգյակի երկրների՝ Ռուսաստանի, Չինաստանի, Ֆրանսիայի, Մեծ Բրիտանիայի և Գերմանիայի միջև միջուկային գործարքի շուրջ բարդ բանակցություններն ավարտական փուլում են, հայտարարել է ԱՄՆ պետքարտուղարության խոսնակ Նեդ Փրայսը:
«Սա վճռորոշ փուլ է, որի ընթացքում մենք կհասկանանք՝ հնարավո՞ր է արդյոք վերադարձը միջուկային գործարքին։ Մենք հասկացրել ենք, որ հաշվի առնելով ներկայիս զարգացումները՝ առաջընթաց գրանցելու համար շատ քիչ ժամանակ է մնացել»,- հայտարարել է նա:
Պաշտոնյայի փոխանցմամբ՝ Վիեննայում բանակցությունները շարունակվում են, իսկ իրանական պատվիրակության հետ անցկացվում են անուղղակի քննարկումներ։
Ավելի վաղ Իրանի արտաքին գործերի նախարար Հոսեյն Ամիր Աբդոլլահիանը բանակցությունների ձգձգման մեջ մեղադրել էր Արևմուտքին: «Մենք հետ չենք կանգնի մեր տրամաբանված և իրատեսական կարմիր գծերից»,- հավելել է նա։
