Արցախում սահմանադրական բարեփոխումների գործընթացը մեկնարկել է: Արցախի նախագահին կից ստեղծվել է հանձնաժողով, որի տասն անդամից հինգը, այդ թվում՝ հանձնաժողովի ղեկավարը, իրավաբաններ են, մյուս մասը՝ ազգային ժողովի քաղաքական ուժերի ներկայացուցիչներ:
Արթուր Հարությունյան (Արցախի ԱԺ «Ազատ հայրենիք-ՔՄԴ» խմբակցության ղեկավար) - Սահմանադրական փոփոխություններն այս պահին իրականում անհրաժեշտություն են, քանի որ հետպատերազմյան ժամանակաշրջանում մեր այսօրվա ստեղծված իրողություններում մեր այսօրվա գործող Սահմանադրությունը չի համապատասխանում մեր իրականությանը:
Գագիկ Բաղունց (Արցախի ԱԺ «Միասնական հայրենիք» խմբակցության ղեկավար) - Այնպիսի դրույթներ, ինչպիսիք են, ասենք, իշխանական ճյուղերի տարանջատման, հստակ տարանջատման պահը, տարբեր ժամանակներում Ազգային ժողովի և հանրապետության նախագահի ընտրությունների անցկացումը և մի շարք նման խնդիրներ:
Հակոբ Հակոբյան (Արցախի «Արդարադատություն» կուսակցության նախագահ) - Այն, ինչի պակասը մենք ունեինք պատերազմից հետո, փորձելու ենք, որ այս Սահմանադրության մեջ ներառվի:
Հանձնաժողովը եռամսյա ժամկետում պետք է հանրապետության նախագահի հաստատմանը ներկայացնի սահմանադրական բարեփոխումների հայեցակարգը:
Արայիկ Լազարյան (Արցախի նախագահին կից սահմանադրական բարեփոխումների հանձնաժողովի նախագահ) - Հանրապետության նախագահի կողմից հայեցակարգին հավանություն տրվելուց հետո սկսվելու է երկրորդ փուլը, համապատասխան հրամանագրով ստեղծվելու է արդեն մասնագիտական հանձնաժողով, որն զբաղվելու է սահմանադրական բարեփոխումների բուն նախագծի մշակմամբ: Այս հանձնաժողովի հիմնական խնդիրը սահմանադրական բարեփոխումների հայեցակարգի մշակումը, հաստատումը և հանրապետության նախագահին ներկայացնելն է:
Ըստ Արայիկ Լազարյանի՝ առայժմ կազմակերպչական հարցեր են քննարկում՝ ակնկալելով հայեցակարգի վերաբերյալ առաջարկություններ և միջնորդություններ:
Արայիկ Լազարյան - Հանձնաժողովը բաց է նման միջնորդությունների և առաջարկությունների ստացման համար: Դրանք բոլորը քննարկվելու են, և դրանց արդյունքներով կայացվելու են համապատասխան որոշումներ: Հանձնաժողովի բնականոն գործունեությունն ապահովում է քարտուղարությունը, որի գործառույթները վերապահված են ԱՀ նախագահի աշխատակազմի կառավարության գործերի կառավարչությանը:
Արցախի գործող սահմանադրությունը համաժողովրդական հանրաքվեով ընդունվել է 2017-ի փետրվարի 20-ին: Կիսանախագահական կառավարման համակարգից երկիրն անցել է նախագահական կառավարման մոդելի:
Արթուր Մոսիյան (Արցախի ԱԺ «Հայ Հեղափոխական Դաշնակցություն» խմբակցության ղեկավար) - Նախագահի ինստիտուտի և խորհրդարանի միջև այդ կոշտ կապը՝ նույն օրը ընտրություն, նույն օրը մեկի հրաժարականի դեպքում մյուսի ցրում, կարող է ֆորսմաժորային իրավիճակներում հանգեցնել բավական խնդիրների: Եվ պատերազմական գործողությունները ցույց տվեցին, որ իրականում հետպատերազմյան շրջանում այդ կոշտ կապը որևէ լավ տեղ չտարավ:
Աշոտ Ղուլյան (Արցախի ժողովրդավարական կուսակցության նախագահ) - Այնպես չէ, որ սահմանադրական փոփոխությունները բոլոր հարցերի համադարման են: Ցանկացած բարդ, ճգնաժամային իրավիճակներում շատ բան կախված է գործող իշխանությունների, երկրի առջև կանգնած մարտահրավերները հաղթահարելու, դրված քաղաքական նպատակներին հասնելու շուրջ հանրային մոբիլիզացիայի կարողություններին և ճիշտ որոշումներ ընդունելու ունակությանը:
Արցախի խորհրդարանական ուժերն առայժմ ձեռնպահ են մնում Սահմանադրության՝ իրենց առաջարկությունների վերաբերյալ հայտարարություն անելուց: Ասում են՝ դեռ մշակում են:
