ՀՀ էկոնոմիկայի նախարարի տեղակալ Արման Խոջոյանի գլխավորած պատվիրակության՝ Մոսկվա կատարած այցի շրջանակում կազմակերպվել են մի շարք հանդիպումներ, որոնց ընթացքում քննարկվել են ռուսաստանյան շուկայում հայկական սննդամթերքի առաջմղման և արտահանումների ընդլայնման հնարավորությունները։
Փետրվարի 8-ին ցուցահանդեսի Հայաստանի տաղավարի գլխավոր տնօրեն Արտյոմ Մուսայելյանի նախաձեռնությամբ, ՀՀ էկոնոմիկայի նախարարության ու ՌԴ-ում Հայաստանի Հանրապետության դեսպանության ակտիվ աջակցությամբ կազմակերպվել է կլոր սեղան՝ ցուցահանդեսի մասնակիցների հետ, որը նվիրված էր Ռուսաստանի Դաշնությունում հայկական արտադրանքի առաջմղմանը։
Հանդիպման ընթացքում ներկայացվել են Հայաստանի նորացված տաղավարը և ավելի ծավալուն ռեսուրսները՝ նախատեսված հայկական ապրանքների ու ապրանքանիշերի առաջմղման և հանրահռչակման համար։
Քննարկվել են առևտրատնտեսական առանձին կառույցների հետ առնչվելիս առաջացող արդիական հարցերը, ինչպես նաև մի շարք կարևոր խնդիրների լուծման ուղիները, որոնց բախվում են օտարերկրյա ընկերությունների ներկայացուցիչները բիզնես գործունեություն իրականացնելու ընթացքում։
Կլոր սեղանին հաջորդել է աշխատաժողով, որի ընթացքում մասնակիցներն անմիջական մթնոլորտում հնարավորություն են ունեցել մտքեր փոխանակել տարբեր խնդիրների շուրջ։
Այցի շրջանակում Արման Խոջոյանը հանդիպել է սննդամթերքի մանրածախ X5 Retail Group ռուսաստանյան ընկերության միջազգային համագործակցության գծով տնօրեն Մարիա Էքսլերի հետ։ Հանդիպման ընթացքում քննարկվել են մանրածախ շուկայում հայկական ապրանքների տեսականու ընդլայնման և մատակարարման խոչընդոտների վերացմանը վերաբերող հարցեր։
Այցի շրջանակում փոխնախարար Արման Խոջոյանը հանդիպում է ունեցել նաև ԵՏՀ արդյունաբերական և ագրոարդյունաբերական համալիրի հարցերով նախարար Արտակ Քամալյանի և գյուղատնտեսության դեպարտամենտի ներկայացուցիչների հետ, քննարկվել են սերմնարտադրության և օրգանական արտադրությանն առնչվող հարցեր։
Հայկական պատվիրակության անդամ, ՀՀ ԷՆ Արդյունաբերության զարգացման վարչության պետ Արմեն Եգանյանը հանդիպում է ունեցել ՌԴ արդյունաբերության և առևտրի նախարարության ավտոմոբիլային արդյունաբերության և երկաթուղային մեքենաշինության դեպարտամենտի տնօրենի տեղակալ Տիգրան Փարսադանյանի հետ։ Հանդիպման ընթացքում զրուցակիցները քննարկել են Հայաստանում ավտոմեքենաների էլեկտրոնային անձնագրերի ներդրմանն առնչվող հարցեր։
