Սահմանադրական բարեփոխումների խորհուրդն արդեն ձևավորված է. այն 11 հոգանոց է, ներգրավված են արդարադատության նախարարը, միջազգային իրավական հարցերով Հայաստանի ներկայացուցիչը, Ազգային ժողովի պետաիրավական հանձնաժողովի նախագահը, Մարդու իրավունքների պաշտպանը, Բարձրագույն դատական խորհրդի անդամ, կառավարող ուժի խորհրդարանական խմբակցության ներկայացուցիչ, մասնակցության իրավունք ուներ նաև խորհրդարանական ընդդիմությունը, նրանք, սակայն, բոյկոտել են պրոցեսն ու հրաժարվել մասնակցությունից: Հանձնաժողովի կազմում են նաև արտախորհրդարանական քաղաքական երկու ուժ ու քաղհասարակության երեք ներկայացուցիչ: Բայց խորհուրդը Սահմանադրություն գրողը չի լինելու:
Այս կազմը երկու ամսում պետք է ձևավորի անկախ մասնագետների 5 հոգանոց հանձնաժողով: Երկաստիճան համակարգը գործընթացի անաչառությունն ապահովելու համար է կիրառվել: Երբ հանձնաժողովը ձևավորվի, մինչև տարեվերջ ժամանակ կունենա բարեփոխումների հայեցակարգ մշակելու համար: Այսինքն՝ բացահայտի գործող Սահմանադրության խութերը, որոշի փոփոխությունների հիմնական վեկտորները, իսկ մինչև գալիք տարվա կեսը պետք է պատրաստ լինի նաև Սահմանադրության փոփոխությունների բուն նախագիծը:
