Արդյոք իշխող ուժն արդեն ունի՞ ՀՀ նախագահի թեկնածու՝ ԱԺ «Քաղաքացիական պայմանագիր» խմբակցության պատգամավորների հետ ճեպազրույցում հարցրին լրագրողները:
Հիշեցնենք, որ նախագահ Արմեն Սարգսյանը հայտնել է հրաժարական տալու իր որոշման մասին:
«Այս պահին ընթացող իրավակարգավորումներով դեռևս 5-6 օր ժամանակ կա, այսինքն՝ Հայաստանն ունի փաստացի նախագահ, և այդպիսի իրավիճակում ժամանակավրեպ ենք համարում քննարկել նման հարց, որովհետև օրենքը հնարավորություն է տալիս դիմումը հետ վերցնելու: Հարցին կանդրադառնանք այն պահին, երբ պաշտոնը թափուր կլինի: Պաշտոնն այս պահին թափուր չէ»,- ասաց «Քաղաքացիական պայմանագիր» խմբակցության պատգամավոր Գևորգ Պապոյանը:
Պապոյանն ավելացրեց, որ ՀՀ նախագահ կլինի այն մարդը, որը կլինի «Քաղաքացիական պայմանագիր» խմբակցության թեկնածուն:
Նշենք, որ եթե ՀՀ նախագահ Արմեն Սարգսյանը մեկ շաբաթվա ընթացքում հետ չվերցնի հրաժարականի մասին իր դիմումը, ԱԺ նախագահը նրա լիազորությունների դադարման մասին արձանագրություն կկազմի և կստորագրի: Հրապարակման պահից հրաժարականը կհամարվի ընդունված:
