Հյուսիսային Կորեան հունվարի 17-ին արևելյան ուղղությամբ արձակել է փոքր հեռահարության պինդ վառելիքային երկու բալիստիկ հրթիռ: Այդ մասին ասված է Ճապոնիայի պաշտպանության նախարարության հաղորդագրության մեջ:
Նշվում է, որ մանրամասները դեռ վերլուծվում են, սակայն այդ հրթիռների թռիչքի առավելագույն բարձրությունը կազմել է 50 կիլոմետր, իսկ դրանց անցած տարածքը՝ մոտ 300 կմ:
Ճապոնիայի պաշտպանական գերատեսչությունից հաստատել են, որ հրթիռները ծովն են ընկել ԿԺԴՀ-ի արևելյան ափի մոտ՝ Ճապոնիայի բացառիկ տնտեսական գոտու սահմաններից դուրս:
«Միանգամայն ակնհայտ է, որ Հյուսիսային Կորեան ընթանում է տեխնոլոգիական մակարդակի բարձրացման և նման սպառազինությունների օգտագործման մեթոդիկայի սրընթաց զարգացման ճանապարհով»,- նշել է Ճապոնիայի պաշտպանության նախարար Նոբուո Կիսին:
Ավելի վաղ Հարավային Կորեայի զինված ուժերի շտաբների պետերի կոմիտեն հայտնել էր, որ հունվարի 11-ին ևս ԿԺԴՀ-ից Ճապոնական ծովի ուղղությամբ արձակվել է բալիստիկ հրթիռ:
