Ռուսաստանի արտգործնախարարությունը հայտնել է, որ հունվարի 14-ին Դաշնության արտաքին գործերի փոխնախարար Անդրեյ Ռուդենկոն երկկողմ հարաբերությունների կարգավորման հարցերով առանձին հանդիպումներ է ունեցել Հայաստանի և Թուրքիայի հատուկ ներկայացուցիչների՝ Ռուբեն Ռուբինյանի և Սերդար Քըլըչի հետ։ Անմիջական շփում է եղել նաև հայ և թուրք հատուկ ներկայացուցիչների միջև։ Այդ մասին հայտնում է ՌԴ ԱԳՆ մամուլի ծառայությունը:
Արտգործնախարարության հայտարարության մեջ նշված է, որ կողմերը պատրաստակամություն են հայտնել երկխոսություն վարել կառուցողական, չքաղաքականացված ձևով, լինել անկեղծ և կենտրոնանալ գործնական արդյունքի վրա՝ «փոքր քայլերով» շարժվելով պարզից դեպի բարդը։
«Պայմանավորվածություն է ձեռք բերվել շարունակել շփման կետերի որոնումը, ինչը կաշխատի ի նպաստ երկու երկրի ժողովուրդների և ի շահ տարածաշրջանի կայունության ու տնտեսական բարգավաճման»,- նշված է հաղորդագրության մեջ:
