Դեկտեմբերի 28-ին՝ ժամը 16.10-ին, ոստիկանության Կենտրոնականի բաժնի համայնքային ծառայողները Տիգրան Մեծի պողոտայից բաժին բերման են ենթարկել 52-ամյա մի տղամարդու, որը զբաղվել է սիգ ձկնատեսակի վաճառքով՝ դրա ձվադրման և արդյունահանման արգելված ժամանակահատվածում:
Տղամարդուց առգրավվել է 48 սիգ:
Նույն օրը, ժամը 15.00-ին, Արաբկիրի համայնքային ոստիկանները Ազատության պողոտայից, արգելված ձուկ վաճառելու կասկածանքով, բաժին բերման են ենթարկել 43-ամյա տղամարդու, որը վաճառելիս է եղել 40 սիգ:
Տղամարդը տվել է բացատրություն, որ ձկները ձեռք է բերել Մալաթիայի գյուղմթերքների շուկայից: Ոստիկանները սիգի վաճառքով զբաղվող անձ են հայտնաբերել նաև Արարատ քաղաքում։ Ժամը 14.20-ի սահմաններում Արարատի ոստիկանները Շահումյան փողոցում նկատել են սիգ վաճառող մի տղամարդու, որը բերման է ենթարկվել բաժին։
Պարզվել է տղամարդու ինքնությունը, որի մոտ եղած արկղում հայտնաբերվել է 47 սիգ: Տղամարդը հայտնել է, որ ձկները գնել է Մարտունի քաղաքի վարչական տարածքից: Հայտնաբերվածը առգրավվել է՝ փորձաքննության ուղարկելու համար:
Ոստիկանության Մարտունու բաժնի ծառայողները, համագործակցելով Գեղարքունիքի մարզային վարչության և Վարդենիսի բաժնի գործընկերների հետ, Սևանա լճից սիգի ապօրինի որսի կանխարգելման միջոցառման շրջանակներում, Արծվանիստ գյուղի «Կարմիր ավազ» կոչվող տարածքից, ապօրինի ձկնորսություն կատարելու կասկածանքով, ոստիկանության Մարտունու բաժին բերման են ենթարկել 34 և 31 տարեկան տղամարդկանց՝ նրանց «ՎԱԶ-2101» մակնիշի ավտոմեքենայի և ձկնորսական մոտորանավակի հետ միասին։
Տղամարդիկ ավտոմեքենայի բեռնախցիկից ներկայացրել են 69 սիգ և 1 իշխան՝ ընդհանուր 27 կգ քաշով: Նրանք բացատրություններ են տվել, որ ձկները որսացել են Սևանա լճից՝ իրենց պատկանող ձկնորսական ցանցերով:
Նշված բոլոր դեպքերով կատարվում է քննություն։
