Բելառուսի և Ռուսաստանի նախագահներ Ալեքսանդր Լուկաշենկոն և Վլադիմիր Պուտինը հեռախոսազրույց են ունեցել, քննարկել երկու երկրների միջև համագործակցության արդիական հարցեր, մասնավորապես՝ պաշտպանական ոլորտում։ Նախագահները քննարկել են նաև Բելառուսի ղեկավարի՝ Սանկտ Պետերբուրգ կատարելիք այցի ընթացքում նախատեսված միջոցառումների ծրագիրը։
*****
ԱՄՆ-ում և արևմտյան մի շարք երկրներում հայտարարություններ են շրջանառվում այն մասին, թե առաջիկայում անվտանգության իրավական երաշխիքների մշակման վերաբերյալ ռուսական առաջարկի քննարկումների ընթացքում ՆԱՏՕ-ի չընդլայնման թեման չի դիտարկվի` հայտարարել է Ռուսաստանի արտգործնախարարության պաշտոնական ներկայացուցիչ Մարիա Զախարովան: «Այս կապակցությամբ ընդգծում ենք, որ հենց ՆԱՏՕ-ի չընդլայնվելն ու մեր անվտանգությանն սպառնացող սպառազինությունների՝ ռուսական սահմանների մոտ չհայտնվելն են ԱՄՆ-ի և ՆԱՏՕ-ի հետ առաջիկա բանակցություններում գլխավոր, առանցքային հարցերը՝ նշել է Զախարովան: Նա ընդգծել է, որ դա պետք է շատ հստակ պատկերացնեն նրանք, ովքեր մինչև հիմա չեն հասկացել ռուսական դիրքորոշման էությունը: Ամենամյա մեծ ասուլիսի ժամանակ ՌԴ նախագահ Վլադիմիր Պուտինը հայտարարել էր, որ 2022թ. սկզբին Ժնևում բանակցություններ կսկսվեն Ռուսաստանի և ԱՄՆ-ի ներկայացուցիչների միջև:
*****
Համաշխարհային ավիացիայի ոլորտը, որը լրջորեն տուժել էր կորոնավիրուսի համաճարակի սկզբում, կրկին հարվածի տակ է։ Դրա պատճառն «Օմիկրոն» շտամի արագ տարածումն է, այդ թվում՝ օդաչուների և օդանավերի անձնակազմի անդամների շրջանում: Սուրբծննդյան նախօրեին եվրոպական և ամերիկյան շատ ավիաընկերություններ ստիպված են եղել չեղարկել չվերթերը։ Ըստ Flightaware կայքի՝ դեկտեմբերի 24-ին ամբողջ աշխարհում չեղարկվել է ավելի քան 2200 ծրագրված չվերթ։ Ճգնաժամն անդրադարձել է այնպիսի ավիաընկերությունների վրա, ինչպիսիք են Lufthansa-ն, Delta-ն և United Airlines-ը։ Օդանավակայանների եվրոպական օպերատորների ասոցիացիան նոյեմբերի 24-ից արձանագրել է ուղևորահոսքի 20 % անկում, երբ Առողջապահության համաշխարհային կազմակերպությունը հայտարարել է «Օմիկրոն» շտամի հայտնաբերման մասին:
*****
Աշխարհի քրիստոնյաների մի մասն այսօր նշում է Սուրբ Ծնունդը: Հռոմի պապ Ֆրանցիսկոսը Սուրբ Ծննդյան իր ուղերձում աշխարհին երկխոսության կոչ է արել: Հռոմի պապը Սուրբ Պետրոսի կենտրոնական պատշգամբից ուղերձ է հղել հարյուրավոր մարդկանց. COVID-19-ի համավարակի պատճառով մասնակիցների թիվը խիստ սահմանափակ է եղել: Պոնտիֆիկոսը դատապարտել է անվերջանալի թվացող հակամարտություններն ու ճգնաժամերը: Սուրբծննդյան ուղերձում նա կոչ է արել անտարբեր չմնալ աշխարհում տեղի ունեցող ողբերգություններին:
*****
Ամերիկյան հայտնի Forbes ամսագիրը ներկայացրել է 2021 թվականի 10 լավագույն ռեստորանները։ Ցանկում տեղ է գտել նաև Հայաստանի Գեղարքունիքի մարզի Ծաղկունք գյուղում կառուցված համանուն ռեստորանը։ Հոդվածի հեղինակը նշում է, որ Հայաստանն աստիճանաբար հաստատվում է աշխարհի խոհարարական քարտեզի վրա:
