Աֆղանստանում «Թալիբան» շարժման անվտանգության ուժերը Քաբուլում հայտնաբերել և վնասազերծել են «Իսլամական պետություն» ահաբեկչական խմբավորման գրոհայինների բջիջ: Այս մասին հինգշաբթի Twitter-ի իր էջում հայտնել է շարժման ներկայացուցիչ Ինամուլա Սամանգանին։
Նրա խոսքով՝ գործողությունը տեղի է ունեցել նոյեմբերի 18-ի առավոտյան՝ Աֆղանստանի մայրաքաղաքի հյուսիսարևմտյան շրջաններից մեկում: Թալիբները ոչնչացրել են մեկ ահաբեկչի և ձերբակալել մի քանի գրոհայինների։ Սամանգանիի խոսքով՝ նրանց նկատմամբ հետաքննություն է ընթանում։
Սեպտեմբեր-նոյեմբեր ամիսներին Աֆղանստանի մի շարք նահանգներում, ներառյալ՝ մայրաքաղաքում, տեղի են ունեցել մի քանի պայթյուններ, զինված հարձակումներ և փոխհրաձգություններ, որոնց զոհ են դարձել ինչպես թալիբներ, այնպես էլ տեղի բնակիչներ: Այդ միջադեպերից մի քանիսի պատասխանատվությունը ստանձնել է «Իսլամական պետությունը»:
