Չորս երկրի զինված ուժերի ստորաբաժանումների մասնակցությամբ ռազմաօդային և ռազմածովային վարժանքներ են անցկացվել Կիպրոսի Լառնակա քաղաքից հարավ գտնվող ծովային շրջանում: Այդ մասին հայտնել է Կիպրոսի ազգային գվարդիայի գլխավոր շտաբը, փոխանցում է ТАСС-ը։
««Քառյակի նախաձեռնության» (QUAD Initiative) շրջանակներում Կիպրոսը, Հունաստանը, Ֆրանսիան և Իտալիան PASSEX փոքրածավալ ավիացիոն զորավարժություններ են անցկացրել չորս երկրի ռազմանավերի և օդանավերի մասնակցությամբ»,- ասված է հաղորդագրության մեջ:
Զորավարժություններին մասնակցել են ֆրանսիական «Օվերն» և հունական «Կունդուրիոտիս» ֆրեգատները, իտալական «Անդրեա Դորիա» էսկադրային ականակիրը և կիպրական «Ալասիա» պարեկային նավը: Զորավարժություններին ներգրավված ավիատեխնիկայի թվում նշվել են AW-139 բազմանպատակային ուղղաթիռները:
«Այդ վարժանքների, ինչպես նաև մի շարք այլ վարժանքների անցկացումը «Քառյակի նախաձեռնության» շրջանակներում, ինչպիսիք են EVNOMIA-2021-ը, ցույց է տալիս չորս երկրների հավաքական մտադրությունը՝ ավիացիոն ներկայություն իրականացնելու Միջերկրական ծովի արևելյան մասում՝ ծովային իրավունքի վերաբերյալ ՄԱԿ-ի կոնվենցիայի պահպանումն ապահովելու, անվտանգությունն ու կայունությունը պահպանելու, ինչպես նաև նավագնացության ազատությունը պաշտպանելու նպատակով»,- պարզաբանել են Կիպրոսի ԶՈՒ գլխավոր շտաբում:
