ԿՔՆՆԱՐԿՎԻ ԵԱՀԿ ՄԽ ՀԱՄԱՆԱԽԱԳԱՀՈՒԹՅԱՆ ԱՇԽԱՏԱՆՔԸ
Ռուսաստանի և Ֆրանսիայի արտաքին գործերի նախարարներն ու պաշտպանական գերատեսչությունների ղեկավարները կքննարկեն Լեռնային Ղարաբաղի հակամարտության կարգավորման ուղղությամբ ԵԱՀԿ Մինսկի խմբի համանախագահության շրջանակում երկու երկրների աշխատանքը: Այս մասին հայտնում է Ֆրանսիայի ԱԳ նախարարությունը: Կողմերի հանդիպումը սպասվում է Լիբիայի խնդրին նվիրված միջազգային համաժողովի շրջանակում, որը տեղի կունենա նոյեմբերի 12-ին Փարիզում։
ՊԵՏՔԱՐՏՈՒՂԱՐՈՒԹՅՈՒՆԸ ԴԱՏԱՊԱՐՏՈՒՄ Է ՀԱՅ ԲՆԱԿՉԻ ՍՊԱՆՈՒԹՅՈՒՆԸ
ԱՄՆ պետքարտուղարության Եվրոպայի և Ասիայի հարցերի բյուրոն դատապարտում է բռնությունը, որը հանգեցրել է հայ խաղաղ բնակչի մահվան Շուշիի մոտակայքում: «Մենք հորդորում ենք Հայաստանին ու Ադրբեջանին՝ ակտիվացնել իրենց ջանքերը, այդ թվում` ԵԱՀԿ Մինսկի խմբի միջոցով, հասնելու Լեռնային Ղարաբաղի հակամարտության հետ կապված կամ դրանից բխող և մինչև հիմա չլուծված բոլոր հարցերի լուծմանը»,- գրել է ԱՄՆ արտաքին քաղաքական գերատեսչությունը Twitter-ի իր էջում:
ՀՀ-Ն ԴՈՒՐՍ Է ԵԿԵԼ ՔԱՂԱՔԱԿԱՆ ՃԳՆԱԺԱՄԻՑ. ԵԽԽՎ ՀԱՄԱԶԵԿՈՒՑՈՂՆԵՐ
Հայաստանը հաջողությամբ դուրս է եկել Լեռնային Ղարաբաղի վերջին պատերազմի հետևանքով առաջացած լուրջ քաղաքական ճգնաժամից, ինչն ինքնին իրական հաջողություն է: Նման հայտարարություն են արել Եվրոպայի խորհրդի Խորհրդարանական վեհաժողովի Հայաստանի պարտավորությունների և հանձնառությունների մոնիտորինգի գծով համազեկուցողներ Կիմմո Կիլյունենը և Բորիանա Աբերգը՝ ամփոփելով 2021 թ. նոյեմբերի 3-5-ը Հայաստան կատարած իրենց այցի արդյունքները: «Ճգնաժամը լուծվել է ժողովրդավարական եղանակով կազմակերպված արտահերթ ընտրություններով՝ չնայած խիստ բևեռացված միջավայրին»,- ասված է զեկույցում:
Համազեկուցողները նշել են, որ բևեռացումը, ցավոք, առկա է Ազգային ժողովում և չի նպաստում խորհրդարանական իրական մշակույթի ձևավորմանը: «Մեր այցը սահմանամերձ Երասխ մեզ հիշեցրեց, որ խաղաղության համապարփակ համաձայնագրի բացակայության պայմաններում անկայունությունը պահպանվում է, իսկ դրա գինը վճարում են խաղաղ բնակիչները: Այնուամենայնիվ, Հայաստանը կարողացել է դժվարին պայմաններում շարունակել առաջընթացը ժողովրդավարության, օրենքի գերակայության և մարդու իրավունքների ճանապարհով, և դա ողջունելի է»,- եզրափակել են համազեկուցողները:
ԷՐԴՈՂԱՆԸ ԵՎ ԱԼԻԵՎԸ ՓՈՐՁՈՒՄ ԵՆ ՓՈԽԵԼ ԵՌԱԿՈՂՄ ՀԱՄԱՁԱՅՆԱԳԻՐԸ
National Interest ամսագիրը հրապարակել է Լեռնային Ղարաբաղին նվիրված հոդված: Հոդվածագիր Մայքլ Ռուբինը գրել է, որ վերջին ամիսներին Ռեջեփ Թայիփ Էրդողանը և Իլհամ Ալիևը եռակողմ համաձայնագրի՝ հաղորդակցությունների ապաշրջաձակման վերաբերյալ կետի հետ կապված փորձել են երկու փոխություն կատարել։ Նախ՝ այդ կետը մեկնաբանել են որպես միջանցքի տրամադրում, որը կիսելու է Հայաստանի ինքնիշխան տարածքը։ Երկրորդ՝ նրանք անտեսում են տարածաշրջանում տնտեսական և տրանսպորտային բոլոր կապերն ապաշրջափակելու հանձնառությունը: Ռուբինի կարծիքով՝ Բայդենի վարչակազմը պետք է հստակ հասկացնի, որ նման վերաիմաստավորումն անհիմն է և ապօրինի։ «Ե՛վ նախագահ Ջո Բայդենը, և՛ Բլինքենը բազմիցս հայտարարել են, որ «դիվանագիտությունը վերադարձել է», բայց երբ խոսքը վերաբերում է Հարավային Կովկասին, այն չկա։ Եթե Բլինքենն իսկապես ցանկանում է նպաստել տարածաշրջանում խաղաղությանը, նա պետք է հետ կանչի Թուրքիայում ԱՄՆ նորանշանակ դեսպան Ջեֆրի Ֆլեյքին և հանձնարարի նրան վերադառնալ Անկարա միայն այն ժամանակ, երբ կարողանա այնտեղ մեկնել Հայաստանի մայրաքաղաքից»»,- նշված է հոդվածում։
ԼՈՍ ԱՆՋԵԼԵՍԻ ՔԱՂԱՔԱՊԵՏԱՐԱՆԻ ՇԵՆՔԸ ԼՈՒՍԱՎՈՐՎԵԼ Է ԵՌԱԳՈՒՅՆՈՎ
Լոս Անջելեսի քաղաքապետարանի շենքը լուսավորվել է հայկական եռագույնով՝ Արցախյան 44-օրյա պատերազմի հրադադարի առաջին տարելիցի առիթով՝ ի հիշատակ զոհվածների և ի համերաշխություն Ադրբեջանում դեռևս գերության մեջ գտնվող հայ ռազմագերիների։
