Հոկտեմբերի 30-ին Վրաստանում տեղի ունեցավ ՏԻՄ ընտրությունների երկրորդ փուլը, որին, ըստ Կենտրոնական ընտրական հանձնաժողովի տվյալների՝ մասնակցել է ավելի քան մեկ միլիոն մարդ, այսինքն՝ ընտրողների գրեթե կեսը։ Քաղաքների մեծ մասում պայքարն ընթացել է իշխող կուսակցության և ամենամեծ ընդդիմադիր ուժի՝ «Միացյալ ազգային շարժում» կուսակցության թեկնածուների միջև՝ գրում է BBC-ն։
Վրաստանի մայրաքաղաքն ավանդաբար դարձել է ընտրական մրցավազքի էպիկենտրոնը։ Այստեղ, ըստ ԿԸՀ-ի, երկրորդ փուլում քվեարկել է գրեթե կես միլիոն ընտրող։
Նախնական տվյալներով՝ Թբիլիսիում հաղթում է իշխող կուսակցության քաղաքապետի թեկնածու, նախկինում հայտնի ֆուտբոլիստ Կախա Կալաձեն: Նա ստացել է ձայների գրեթե 56%-ը։ Նրա մրցակցի՝ «Միացյալ ազգային շարժման» նախագահ Նիկա Մելիայի օգտին քվեարկել է ընտրողների 44 տոկոսը։
Իշխող կուսակցության թեկնածուները հաղթում են ևս 18 մունիցիպալիտետներում, այդ թվում՝ բոլոր չորս ինքնակառավարվող քաղաքներում՝ Ռուսթավիում, Քութայիսում, Փոթիում և Բաթումում։
Միակ բացառությունը, որտեղ հաղթում է ընդդիմության թեկնածուն, Վրաստանի արևմտյան Ծալենջիխայի քաղաքն է: Այստեղ իր մրցակցից մոտ երկու տոկոսով առաջ է «Միացյալ ազգային շարժման» թեկնածուն:
Ընդդիմությունը հայտարարել է, որ համաձայն չէ քվեարկության նախնական արդյունքների հետ։ Նիկա Մելիան ասել է, որ բազմաթիվ մունիցիպալիտետներում ընդդիմության հաղթանակը գողացվել է։ Որոշակի ծրագրերի մասին Մելիան դեռ չի խոսել՝ խոստանալով, որ դրանք հայտնի կդառնան կիրակի։
«Խոստանում եմ, որ պայքարն անզիջում է լինելու»,- ասել է ՄԱԿ-ի առաջնորդը։
Դիտորդները նկատել են, որ քվեարկությունն անցել է ծայրահեղ բևեռացված միջավայրում և հակառակորդների դեմ բացասական հռետորաբանության ֆոնին։
