Ավելի քան 53 հազար աֆղանստանցի փախստականներ գտնվում են ԱՄՆ-ի ռազմաբազաներում: Այս մասին հայտնել է Պենտագոնի մամուլի քարտուղար Ջոն Կիրբին, փոխանցում է ТАСС-ը։
Նա ընդգծել է, որ 53157 փախստական գտնվում է ԱՄՆ-ի 8 ռազմաբազայում: Նրանցից 6689-ն արդեն անցել են բոլոր անհրաժեշտ ընթացակարգերը՝ ամերիկյան քաղաքներում վերաբնակեցման ծրագրին մասնակցելու համար: Կիրբիի խոսքով՝ ավելի քան 3 հազար աֆղանստանցի գտնվում է Մերձավոր Արևելքի, Արևելյան Աֆրիկայի և Կենտրոնական Ասիայի ամերիկյան ռազմաբազաներում, ևս 463 մարդ՝ Եվրոպայի:
The Washington Post թերթի տվյալներով՝ օգոստոսի 17-ից Միացյալ Նահանգներ է տարհանվել ավելի քան 60 հազար աֆղանստանցի, որոնք ժամանակին օգնություն են ցուցաբերել ամերիկյան զորքերին: Հոկտեմբերի 7-ին Պենտագոնում հայտնել են, որ ԱՄՆ կառավարությունը վերսկսել է Աֆղանստանի քաղաքացիների տարհանումը ԱՄՆ:
