Ֆինանսների նախարար Տիգրան Խաչատրյանը աշխատանքային հանդիպում է ունեցել «Բեռլին Էկոնոմիկս» անկախ խորհրդատվական ընկերության և «Գերմանական տնտեսական միավորում» ՀԿ ներկայացուցիչների հետ:
Հանդիպման ընթացքում նախարար Խաչատրյանը հյուրերին է ներկայացրել ՀՀ կառավարության առաջիկա հինգ տարիների ծրագրով նախանշված առաջնահերթությունները, ինչպես նաև խոսել է գործող արտաքին պարտքի կառավարելիության և մակրոտնտեսական ոլորտի առանձնահատկությունների մասին:
Շնորհակալություն հայտնելով նախարարին ընդունելության համար՝ «Բեռլին Էկոնոմիկս» ընկերության գործադիր տնօրեն Ռիկարդո Ջիուչիին իր պատրաստակամությունն է հայտնել՝ համագործակցելու երկուստեք հետաքրքրություն ներկայացնող հարցերի շրջանակում, ինչպես նաև շեշտել է, որ գերմանացի գործընկերներն ուշադրությամբ են հետևում ՀՀ կառավարության գործունեությանը և ողջունում են ընթացիկ աշխատանքներում տարվող բարեփոխումները:
Հանդիպման ընթացքում կողմերը կարևորել են համագործակցության ընդլայնման հնարավորությունները, ինչպես նաև պայմանավորվածություն ձեռք բերել շարունակելու օրակարգային հարցերի վերաբերյալ երկխոսությունը՝ միաժամանակ աջակցելով հայ-գերմանական երկկողմ տնտեսական կապերի զարգացմանը:
