ՀՀ ԱԺ տարածաշրջանային և եվրասիական ինտեգրման հարցերի մշտական հանձնաժողովի հոկտեմբերի 11-ի նիստում քննարկվել է «Եվրասիական տնտեսական միության անդամ երկրների պետական գնումներին մասնակցության և շուկաների հասանելիության արդի հիմնախնդիրները ՀՀ գործարարների համար» հարցը:
ՀՀ էկոնոմիկայի նախարարի տեղակալ Վարոս Սիմոնյանը նշել է, որ 2020 թ. նոյեմբերին ընդունված որոշման համաձայն՝ ԵԱՏՄ անդամ պետությունների բոլոր տնտեսվարող սուբյեկտները պետք է ունենան հավասար իրավունքներ պետական և մունիցիպալ գնումներին մասնակցության համար:
Այս հարցում մեր տնտեսվարողները չեն ունեցել համահավասար իրավունք, ինչպես ՌԴ տնտեսվարողները, և որոշում է կայացվել 10 խոշոր ոլորտներում ԵԱՏՄ անդամ երկրների տնտեսվարողներին տալ համահավասարության իրավունք:
Որոշակի ծագման կանոններ են խստացվել ու հստակեցվել, մասնակցության իրավունք ստանալու համար որոշակի պայմաններ են սահմանվել, հատուկ ռեեստր է գործում: Վերոնշյալ ոլորտներն են՝ հաստոցաշինություն, մեքենաշինություն, կահույքի և փայտամշակման արդյունաբերություն, երկաթուղային մեքենաշինություն, կոմպրեսորային և սառնարանային արտադրություն, թեթև քիմիական արդյունաբերություն և նավաշինություն:
Ըստ փոխնախարարի՝ մեր երկիրը թեև չունի նման արտադրական հզորություններ, սակայն մեր կողմից սա օգտագործվում է նաև ռազմավարական դիրքավորման տեսանկյունից՝ որպես ներդրումների ներգրավման միջոց:
Նշվել է, որ մի շարք աշխատանքներ ենք իրականացրել, այդ թվում՝ իրազեկման, տնտեսվարողներին ներկայացվել է ընթացակարգը:
Պատգամավորների հարցերն առնչվել են գնումների ընթացակարգերին, ԵԱՏՄ շուկայում հայկական արտադրանքի մրցունակության բարձրացմանն ուղղված քայլերին, տեխնիկական կարգավորումներին, հայկական ընկերությունների՝ ԵԱՏՄ անդամ երկրների պետական գնումներին մասնակցության վիճակագրությանը, որոնց առնչությամբ պարզաբանումներ են ներկայացրել Վարոս Սիմոնյանը և ՀՀ ֆինանսների նախարարի տեղակալ Ավագ Ավանեսյանը:
Նշվել է, որ հայկական ընկերությունները մրցույթներում հաղթող են ճանաչվում հիմնականում Բելառուսում և Ռուսաստանում, իսկ Հայաստանում՝ ՌԴ տնտեսվարող սուբյեկտները:
Նշվել է, որ հանձնաժողովի անդամներից ստացված գրավոր առաջարկները կամփոփվեն և կուղարկվեն Կառավարություն:
