Վրաստանի ԱԳՆ ռազմավարական հաղորդակցությունների վարչությունը հերքել է արտաքին գործերի նախարար Դավիթ Զալկալիանիի հայտարարությունն այն մասին, որ երկիրը պետք է ներկայացված լինի «3+3» բանակցային ձևաչափում (Հայաստան, Վրաստան, Ադրբեջան և Ռուսաստան, Թուրքիա, Իրան):
«Ցավոք, սոցիալական ցանցերում սխալ է մեկնաբանվում Վրաստանի արտաքին գործերի նախարարի՝ Հանրային հեռարձակողի հետ հարցազրույցը։ Արտաքին քաղաքական գերատեսչությունը բազմիցս հայտարարել է, որ չի քննարկում երկրի մասնակցությունը Ռուսաստանի հետ, այսպես կոչված, «3+3» ձևաչափին։ Չնայած դրան՝ միտումնավոր տեղեկատվություն է տարածվում այն մասին, թե իբր նախարարը հաստատել է Վրաստանի մասնակցությունը նշված ձևաչափին»,- ասված է վարչության հայտարարության մեջ:
Վրաստանի Առաջին ալիքին ավելի վաղ տված հարցազրույցում Դավիթ Զալկալիանին հայտարարել էր, որ չնայած Ռուսաստանի հետ բարդ հարաբերություններին՝ նման խոշոր աշխարհաքաղաքական նախագծերում Վրաստանը պետք է գոնե ինչ-որ կերպ ներկայացված լինի:
