Նյու Յորքում կայացել է Միացյալ Նահանգների նախագահի պաշտոնում Ջո Բայդենի առաջին ելույթը ՄԱԿ-ի Գլխավոր վեհաժողովում՝ գրում է BBC-ն: Իր ուղերձում նախագահը նշել է, որ մոտենում է ամբողջ աշխարհի համար որոշիչ տասնամյակ, և խոստացել է կատարել ԱՄՆ-ի բոլոր դաշնակցային պարտավորությունները:
Վերջին շրջանում Վաշինգտոնի և նրա մշտական դաշնակիցների միջև հարաբերությունները ծանր ժամանակներ են ապրում: Իրավիճակը սրվել է Աֆղանստանից ամերիկյան զինուժի դուրսբերումից հետո, ինչը հանգեցրել է Բայդենի և նրա վարչակազմի սուր քննադատությանը արևմտյան գործընկերների կողմից, ինչպես նաև հայրենիքում:
Բացի դրանից՝ դեռևս չի հաղթահարվել ԱՄՆ-ի, Ավստրալիայի և Ֆրանսիայի միջև դիվանագիտական սկանդալը, որն առաջացավ սուզանավերի կառուցման վերաբերյալ պայմանավորվածությունների պատճառով: Ֆրանսիայի ղեկավարությունը ամերիկացի և ավստրալացի գործընկերների գործողությունները անվանել է «հարված մեջքից» և հետ կանչել իրենց դեսպաններին այդ երկու երկրից:
Ըստ փորձագետների՝ Բայդենի նախագահական ընտրարշավը կառուցվել է «Ամերիկան վերադարձել է» կարգախոսի շուրջ, որը, ենթադրաբար, պետք է նշանակեր Դոնալդ Թրամփի մեկուսացման կուրսի ճիշտ հակառակը: Մինչդեռ, շատերի կարծիքով, Բայդենի նախագահության առաջին ութ ամիսները չափազանց վիճելի էին:
«Ես համոզված եմ, որ մենք պետք է ավելի սերտ աշխատենք միասին, քան երբևէ: Մեր հաջողությունը կապված է մյուսների հաջողության հետ»,- ասել է Բայդենը Գլխավոր վեհաժողովում իր ելույթում:
ԱՄՆ նախագահն անդրադարձել է նաև Վաշինգտոնի և Պեկինի միջև շարունակվող լարվածությանը և ընդգծել, որ Միացյալ Նահանգները չի ձգտում նոր սառը պատերազմի կամ աշխարհի պառակտման, բայց շարունակելու է եռանդով պաշտպանել իր երկրի և դաշնակիցների շահերը ոտնձգություններից:
ՄԱԿ-ի Գլխավոր վեհաժողովի 76-րդ նստաշրջանը Նյու Յորքում տեղի է ունենում կլիմայի ճգնաժամի և համաճարակի վատթարացման ֆոնին: Դիտորդների կարծիքով՝ այս երկու խնդիրն էլ ավելի են սրել համաշխարհային տարաձայնությունները:
