Յուրաքանչյուր մահ ցավալի կորուստ է մեզ համար, իսկ երիտասարդ հղի կնոջ մահն ուղղակի հոգեմաշ է անում: Այս մասին Ֆեյսբուքի իր էջում գրել է ՀՀ առողջապահության նախարար Անահիտ Ավանեսյանը՝ շարունակելով պատասխանել կորոնավիրուսի վերաբերյալ բարձրացված հարցերին:
- Արդյոք մարդն ազատ չէ՞ ընտրելու՝ հիվանդանալ և ապրել «ինչ կլինի՝ կլինի» սկզբունքով:
- Ո՛չ, քանի որ գործ ունենք հանրային վտանգավոր, վարակիչ հիվանդության հետ։ Այս դեպքում դուք միայն ձեր կյանքի և առողջության համար որոշում չեք կայացնում, այլև ուրիշների, ինչպես, օրինակ՝ մահացած հղի կնոջ: Խնդրեմ, եթե դուք ապրում եք քաղաքակրթությունից կտրված սարի գլխին և որևէ շփում չունեք մարդկության հետ, ազատ կերպով մի պատվաստվեք, դիմակ մի կրեք, ուժգին փռշտացեք, հիվանդացեք և մի բուժվեք, իսկ եթե, այնուամենայնիվ, ապրում եք սոցիումի մեջ, ապա չեք կարող ձեր որոշումներով վտանգել այլոց կյանքն ու առողջությունը
- Ե՞րբ կլինի «Պֆայզեր» պատվաստանյութը:
- Այս պահին հստակ ժամկետ չենք կարող նշել, բայց տարվում են աշխատանքներ։ Հայաստանում այսօր առկա պատվաստանյութերը բավարար արդյունավետ են՝ որակի բոլոր անհրաժեշտ չափանիշներին համապատասխան, և լուծում են մեր առջև ծառացած խնդիրը, այն է՝ կանխել հիվանդության ծանր և ծայրահեղ ծանր ընթացքը և մահերը։ Սպասելու իմաստ, անհրաժեշտություն և ժամանակ չկան։
- Իրավաբան լինելով՝ ինչպե՞ս եք որոշել կիրառության մեջ դնել այս կամ այն պատվաստանյութը:
- Գոյություն ունի նախարարին կից խորհուրդ, որը ներառում է ոլորտի քսանից ավելի մասնագետների, որոնք մանրակրկիտ ուսումնասիրելուց հետո տալիս են եզրակացություն, առաջարկ, և դրա հիման վրա էլ ընդունվում է նախարարի հրամանը։
- Արդյոք պատվաստումներն արվում են «գումար աշխատելու» նպատակով:
- Ճիշտ հակառակը՝ պատվաստանյութերը հիվանդության հաղթահարման ամենամատչելի միջոցն են։
Եվ, ցավոք, դեռ շարունակելու ենք հանրային միջոցները ծախսել թանկարժեք բուժումների վրա, քանի որ չենք ուզում կանխարգելել։ Ցավոք, այսօր շատերը պատրաստ են առանց բժշկի հետ խորհրդակցելու անցնել բազմակի թանկարժեք հետազոտություններ, խմել հորմոնային դեղեր, վերջին սերնդի ամենաուժեղ հակաբիոտիկներ՝ առանց աչք թարթելու, իսկ բժիշկների կողմից ցուցված կանխարգելիչ պատվաստմանը մտավախությամբ մոտենալ, այնինչ Հայաստանի բնակչության 95 տոկոսը մշտապես ստացել է մանկական հասակում անհրաժեշտ բոլոր պատվաստումները։ Հիմա ինչո՞ւմն է խնդիրը, հասկանալի չէ:
Հետևությունները թողնում եմ ձեզ, սիրելի՛ քաղաքացիներ, թույլ մի՛ տվեք, որ հակագիտական ստերով և էժան շահարկումներով վտանգեն բոլորիս առողջությունը: Այո՛, հոկտեմբերի 1-ից նոր կանոնները մտնելու են ուժի մեջ։ Առո՛ղջ եղեք:
