Հայանպաստ դիրքորոշումներով հայտնի կոնգրեսական Ադամ Շիֆը Ադրբեջանին ռազմական օգնությունից զրկելու մասին ԱՄՆ-ի Ներկայացուցիչների պալատի ընդունած օրինագիծը հաղթանակ է համարում։ Միևնույն ժամանակ, նա ընդգծում է, որ այն դեռ պետք է արժանանա Սենատի և երկրի նախագահի հավանությանը։ Խոսելով հայ-ադրբեջանական սահմանին տիրող լարված իրավիճակի մասին` կոնգրեսականը հատուկ ընդգծել է ԵԱՀԿ Մինսկի խմբի դերի մեծացումն ու կարևորել հայ-ամերիկյան հարաբերությունների զարգացումը՝ փոխանցում է «Ամերիկայի ձայնը»:
«Իմ կարծիքով՝ չպետք է ֆինանսավորել մի երկիր, որտեղ մարդու իրավունքները ոտնահարվում են, և որը սպառնում է տարածաշրջանային անվտանգությանն ու խաղաղությանը։ Բացի այդ, Ադրբեջանի կողմից հրադադարի ռեժիմը խախտելու դեպքերի հետևանքով սահմանին մտահոգիչ իրավիճակ է ստեղծվել, ցավոք, վերջին օրերին եղել են նաև զոհեր»։
Ներկայացուցիչների պալատի ընդունած օրինագիծը դեռ մի քանի փուլեր պետք է անցնի: Կոնգրեսականը նկատում է, որ Սենատի և նախագահի հավանությանն արժանանալու դեպքում այն կարող է հետագա տարիների ընթացքում ևս պահպանվել։ Հարկ է նշել, որ ընդունված վերջին օրինագիծը վերաբերում է գալիք բյուջետային տարվա ֆինանսավորմանը։
«Հուսանք` այն Սենատում ևս հաջողություն կունենա: Որպես կանոն՝ մենք անցած տարիների ընթացքում տեսել ենք, որ նմանօրինակ նախագծերը չեն արժանանում Սենատի հավանությանը, բայց մենք պետք է պայքարենք նույն բովանդակությամբ օրինագիծը վերջնական հաջողության հասցնելու համար։ Այս բովանդակությամբ սա առաջին օրինագիծն է, որն արժանանում է Ներկայացուցիչների պալատի հավանությանը»։
Պետքարտուղար Բլինքենի և ԱՄՆ-ի նախագահին կից ազգային անվտանգության հարցերով խորհրդականին կոնգրեսականը ներկայացրել է իր մոտեցումները ԵԱՀԿ Մինսկի խմբի ունեցած դերակատարության ակտիվացման վերաբերյալ: Ըստ նրա՝ Մինսկի խումբը պետք է իր հստակ ասելիքն ունենա ստեղծված իրավիճակի վերաբերյալ` առաջարկելով գործնական լուծումներ բոլոր կողմերին:
«Այդ տարածաշրջանում պետք է վերջնական խաղաղություն հաստատվի, և այստեղ Մինսկի խումբը պետք է ունենա իր կարևոր դերակատարությունը: Պատերազմից հետո դեռ մարդասիրական ճգնաժամը չի վերացել, մարդիկ պետք է անվտանգության երաշխիքներ ունենան իրենց բնակարաններ վերադառնալու համար։ Մենք խիստ մտահոգ ենք վերջին օրերի սահմանային լարվածության դեպքերով: Այս հակամարտությունը պետք է վերջնական լուծում ստանա»:
Կոնգրեսական Ադամ Շիֆը նշել է, որ շարունակելու է աջակցել հայանպաստ բոլոր նախաձեռնությունները` այդ համատեքստում հատուկ ընդգծելով իր աջակցությամբ վերջերս դաշնային կառավարության կողմից հայ-ամերիկյան թանգարանի շինարարության համար տրամադրված շուրջ 1 մլն դոլարը:
