ՀՀ քննչական կոմիտեի հատկապես կարևոր գործերի քննության գլխավոր վարչությունում ավարտվել է համակարգչային տեխնիկայի օգտագործմամբ առանձնապես խոշոր չափերով հափշտակություն կատարելու դեպքի առթիվ հարուցված քրեական գործից անջատված մասով նախաքննությունը:
Քննությամբ պարզվել է, որ 43-ամյա տղամարդը, 2019 թ. հոկտեմբերի 8-ին Հայաստանյան բանկերից մեկում բացել է ընթացիկ և քարտային հաշիվներ և 5 օր անցч հոկտեմբերի 13-ին՝ ժամը 20:43-ին, ընթացիկ հաշվին կանխիկ եղանակով մուտքագրել է 9.800.000 ՀՀ դրամ, որը հաջորդ օրը ամբողջությամբ Ինտերնետ բանկ ծառայության միջոցով փոխանցել է քարտային հաշվին, որից հետո մեկ այլ ընկերության օնլայն համակարգի միջոցով, իր քարտային հաշվին կցված վճարային քարտից իրականացրել է 9.775.025 ՀՀ դրամի չափով առցանց փոխանցում այդ ընկերության հաշվեհամարին: Այնուհետև, նույն օրը՝ ժամը 13:42-ին, մեկ այլ բանկի բանկոմատով ծածկագրի 3 անգամյա հաջորդաբար սխալ մուտքագրմամբ դիտավորյալ բլոկավորել է իր քարտային հաշվին կցված վճարային քարտը, որից հետո, համակարգչային տեխնիկայի օգտագործմամբ ուրիշի գույքի առանձնապես խոշոր չափերով հափշտակության գործընթացն ավարտին հասցնելու նպատակով, Ինտերնետ բանկ ծառայության միջոցով բարեհաջող իրականացրել է իր քարտային հաշվում ֆիզիկապես գոյություն չունեցող վերոհիշյալ գումարների հետ փոխանցում իր ընթացիկ հաշվին և կանխիկացրել գումարը:
Ձեռք բերված բավարար ապացույցների համակցությամբ 43-ամյա տղամարդուն մեղադրանք է առաջադրվել ՀՀ քրեական օրենսգրքի 181-րդ հոդվածի 3-րդ մասի 1-ին կետով (Հափշտակությունը, որը կատարվել է համակարգչային տեխնիկայի օգտագործմամբ): Վերջինիս նկատմամբ որպես խափանման միջոց է ընտրվել կալանավորումը:
Անջատված մասով նախաքննությունն ավարտվել է, և քրեական գործը՝ մեղադրական եզրակացությունը հաստատելու միջնորդությամբ, ուղարկվել է դատախազին:
