Թուրքիայի նախագահ Թայիփ Էրդողանը հայտարարել է Ստամբուլյան ջրանցքի կառուցման մոտալուտ մեկնարկի մասին, որը կընթանա Բոսֆորի նեղուցին զուգահեռ և կկապի Սև ու Մարմարա ծովերը:
Անցած շաբաթ Էրդողանը մասնակցել է Ստամբուլյան ջրանցքի շինարարության մեկնարկի արարողությանը, որը սկսվեց ապագա ջրանցքի վեց կամուրջներից մեկի կառուցումով:
Թուրքիայի առաջնորդը կրկին մեղադրել է ընդդիմությանը ջրանցքի կառուցմանը միջամտելու համար: Թուրքիայի ընդդիմադիր «Լավ կուսակցության» (İYİ) առաջնորդ Մերալ Աքշեները կոչ է արել երկրի իշխանություններին անցկացնել համաժողովրդական հանրաքվե՝ Ստամբուլի արհեստական ջրանցքի կառուցման վերաբերյալ՝ հաղորդում է Hürriyet Daily News-ը:
Աքշեները խոստացել է, որ ընդդիմությունը չի առարկի նախագծին և չի դիմի միջազգային դատարաններ, եթե այն կառուցվի հանրաքվեով քաղաքացիների հաստատումից հետո: Թուրքիայի ընդդիմադիր կուսակցությունները, ներառյալ առաջատար ընդդիմադիր Ժողովրդահանրապետական կուսակցությունը (RPP), նախազգուշացրել են օտարերկրյա ֆինանսական հաստատություններին, որ դեմ են լինելու նախագծի կառուցման համար Էրդողանի կառավարության նախատեսած պարտքի վճարմանը, որը տարբեր գնահատումներով կազմում է 15-25 միլիարդ դոլար: