ԵԱՀԿ ՆԱԽԱԳԱՀԸ ԿՈՉ Է ԱՐԵԼ ՎԵՐԱԴԱՐՁՆԵԼ ԳԵՐԻՆԵՐԻՆ
ԵԱՀԿ գործող նախագահ, Շվեդիայի արտգործնախարար Անն Լինդեն անդրադարձել է ԼՂ հակամարտության ու ԵԱՀԿ-ի՝ հակամարտության կարգավորման ջանքերին: Ի պատասխան հարցին, որ Հայաստանում հիասթափված են ԵԱՀԿ-ից, ու ԵԱՀԿ-ն ոչինչ չի արել Արցախյան երկրորդ պատերազմի ընթացքում, նա ասել է.
«Հակամարտությունների կարգավորման համար անհրաժեշտ է ստեղծել ցավերը մեղմող և հաշտության համար ամուր հիմք ունեցող միջավայր: Երկխոսությունն անհրաժեշտ է տարածաշրջաններում խաղաղության հաստատման համար: Համաձայն չեմ, թե ԵԱՀԿ-ն ջանք չի ներդնում ԼՂ խնդրի կարգավորման համար: Ես հատուկ ներկայացուցիչ ունեմ, որը շատ ակտիվ աշխատում է: Նրա հետ երեկ եմ հանդիպել՝ իրավիճակը քննարկելու համար: Կա նաև Մինսկի խմբի համանախագահությունը՝ ՌԴ, Ֆրանսիայի և ԱՄՆ համանախագահությամբ, որը սակայն անցյալ տարի սահմանափակ հնարավորություն է ունեցել այցելել տարածաշրջան՝ նաև կորոնավիրուսի համավարակի պատճառով: Նաև կարևոր էր 15 գերիների վերադարձը, նաև ականապատ տարածքների քարտեզների փոխանցումը: Այդ հարցում բարձր եմ գնահատում նաև Վրաստանի ջանքերը: Դրանք վստահության ամրապնդման միջոցառումներ էին: Ես հորդորում եմ Հայաստանին և Ադրբեջանին ամրապնդել վստահությունը՝ ազատ արձակելով բոլոր գերիներին և ԵԱՀԿ հովանու ներքո՝ իմ անձնական ներկայացուցիչ Կասպշիկի միջնորդությամբ՝ գտնելու քաղաքական լուծումը, քանի որ դեռևս չկա նաև խաղաղության համաձայնագիրը»:
ՔՆՆԱՐԿՎԵԼ Է ՏԵՂԱՀԱՆՎԱԾՆԵՐԻ՝ ԼՂ ՎԵՐԱԴԱՐՁԻ ՀԱՐՑԸ
Ռուսաստանի արտաքին գործերի նախարար Սերգեյ Լավրովը ՄԱԿ-ի փախստականների հարցերի գլխավոր հանձնակատար Ֆիլիպպո Գրանդիի հետ, ի թիվս այլ հարցերի, քննարկել է փախստականների և ժամանակավորապես տեղահանված անձանց՝ Լեռնային Ղարաբաղ վերադարձի հարցը: Քննարկվել են Ռուսաստանի, Ադրբեջանի և Հայաստանի ղեկավարների 2020-ի նոյեմբերի 9-ի եռակողմ հայտարարությանը համապատասխան փախստականների և ժամանակավորապես տեղահանված անձանց՝ Լեռնային Ղարաբաղ և հարակից շրջաններ վերադարձնելու հարցը»,- նշված է ՌԴ արտգործնախարարության տարածած հաղորդագրությունում:
ԶԱՔԻՐ ՀԱՍԱՆՈՎԻ ՀԵՐԹԱԿԱՆ ԽՈՍՏՈՎԱՆՈՒԹՅՈՒՆԸ
Ադրբեջանի պաշտպանության նախարար Զաքիր Հասանովն ադրբեջանական Real TV-ի հետ հարցազրույցում հերթական անգամ խոստովանել է, որ Արցախյան երկրորդ պատերազմը նախագծվել և իրականացել է Թուրքիայի անմիջական մասնակցությամբ: Նա ընդունել է, որ իրենց բանակն արդյունքի է հասել թուրքական զինուժի շնորհիվ: Ադրբեջանի բանակը մանևրելու կարողությունները զարգացնելու համար սեպտեմբերին Թուրքիայի և Պակիստանի զինված ուժերի հետ համատեղ զորավարժություններ կանցկացնի,- ասել է նա:
