ՀՀ ԿԳՄՍ նախարարի տեղակալ Արա Խզմալյանն աշխատանքային այց է կատարել Հովհաննես Շարամբեյանի անվան ժողովրդական արվեստների թանգարան, հայտնում են ԿԳՄՍ նախարարությունից:
Այցի նպատակն էր ծանոթանալ թանգարանի մշտական և ժամանակավոր ցուցադրություններին, իրականացվող գիտահետազոտական աշխատանքներին, քննարկել ժողովրդական ստեղծագործության և արհեստների պահպանության, ուսումնասիրման, տարածման ու հանրահռչակման ոլորտներում թանգարանի դերի վերարժևորման անհրաժեշտությունը:
Արա Խզմալյանը նշել է, որ առաջիկա անելիքները պետք է ուղղված լինեն մարզային մշակութային հաստատությունների, միջազգային կազմակերպությունների հետ համագործակցության խորացմանը:
Նախարարի տեղակալը կարևորել է ժողովրդական արվեստի հետագա զարգացման ուղղությամբ թանգարանի կողմից իրականացվող աշխատանքների ընդլայնումն ավանդական արհեստների ուսուցման, ոչ նյութական մշակութային ժառանգության կրողների փորձի փոխանցման, վարպետության դասերի և գիտակրթական ծրագրերի իրականացման շրջանակում:
