ՀՀ պաշտպանության նախարարի հրամանով ստեղծվել է Արցախյան 44-օրյա պատերազմի ընթացքը քննող հանձնաժողով: Այս մասին այսօր՝ լրագրողների հետ զրույցում, հայտնել է ՀՀ ԶՈՒ գլխավոր շտաբի պետ Արտակ Դավթյանը:
«Այն ակտիվ աշխատում է: Ինչ վերաբերում է պատերազմում եղած դասալիքներին, բավականին մեծ թվով քրեական գործեր են հարուցված։ Առաջարկում եմ սպասել գործերի արդյունքներին և ավարտին»,- ասաց Դավթյանը:
Դիտարկմանը՝ հարցեր են հնչում, թե ինչո՞ւ Շուշին այդպես հեշտ հայտնվեց հակառակորդի վերահսկողության տակ, Դավթյանը պատասխանեց.
«Մենք ուսումնասիրություն անում ենք, չեմ կարծում, որ կարճ ժամկետում դրա պատասխանը տանք, որովհետև յուրաքանչյուր դրվագի, յուրաքանչյուր մեղադրանքի հետևում կանգնած են կենդանի մարդիկ, զինծառայողներ, որոնք կա՛մ պետք է պատասխանատվություն կրեն, կա՛մ այդպիսի մեղադրանքը պետք է մերկապարանոց չասվի: Մեզ համար ինքնանպատակ խնդիր չենք դրել, որ ինչ-որ մեկին մեղադրենք: Մասնավորապես, Գլխավոր շտաբի, ՊՆ-ի համար առաջին հերթին դասեր քաղելու խնդիրն է, որպեսզի բոլոր թերությունները, բացերը ուսումնասիրենք և կարողանանք ըստ դրա որոշումներ կայացնել»:
