Հանրապետությունում շարունակվում են արձանագրվել սնկից թունավորման դեպքեր, հայտնում են Հիվանդությունների վերահսկման և կանխարգելման ազգային կենտրոնից:
Սնկից առաջացած թունավորումներն ունենում են սուր ընթացք:
Հիվանդության առաջին նշանները կարող են ի հայտ գալ 15 րոպեից մինչև 72 ժամվա ընթացքում:
Կլինիկական հիմնական ախտանշաններն են՝ որովայնի կտրուկ ցավը, սրտխառնոցը, անընդհատ փսխումները, առատ քրտնարտադրությունը, թքահոսությունը, գլխապտույտը, գլխացավը, անհագ ծարավի զգացումը, հալյուցինացիաները` առանց քնկոտության, ցնորքը, գիտակցության կորուստը, դեմքի կարմրությունը, սրտխփոցը, վախի զգացումը, լյարդի ախտահարման հետևանքով մեծացած և ցավոտ լյարդը, դեղնուկը, լյարդային կոման, երիկամների ախտահարումը:
Հիվանդության առաջին նշանների ի հայտ գալուն պես անմիջապես անհրաժեշտ է դիմել բժշկի։
Սնկից թունավորումներից և հետագա բարդություններից խուսափելու նպատակով մասնագետները քաղաքացիներին ևս մեկ անգամ հորդորում են՝
սննդում չօգտագործել անհայտ ծագման սունկ.
չհավաքել սունկ ճանապարհների եզրերից.
ուտելու և թունավոր սունկը տարբերակելու համար հիմք չընդունել նկարները, քանի որ թունավոր սնկերը շատ հաճախ աճում են ուտելի սնկերի մոտ և կարող են արտաքին տեսքով շատ նման լինել միմյանց.
ուտելու և թունավոր սունկը տարբերակելու համար հիմք չընդունել ժողովրդական առասպելները, ըստ որոնց թունավոր սնկերին չեն մոտենում միջատները և այլ կենդանիները, կամ եփելու ընթացքում արծաթը սևանում է և սևացնում է սնկային արգանակը.
երեխաներին չկերակրել սնկով.
աղեստամոքսային համակարգի խնդիրներ ունեցող մարդկանց խորհուրդ չի տրվում սննդում օգտագործել սունկ.
սնկի հետ չօգտագործել ալկոհոլ, քանի որ այն ակտիվացնում է մի շարք թունավոր նյութեր.
թարմ սնկերը 1 օրից ավելի չպահել նույնիսկ սառնարանային պայմաններում.
;
