Իսրայելը կարող է կոալիցիոն կառավարություն ձևավորել առանց գործող վարչապետ Բենյամին Նեթանյահուի: Իսրայելի նախագահը կառավարություն ձևավորելու հնարավորություն է տվել ընդդիմադիր Յաիր Լապիդին: «Յամին» կուսակցության առաջնորդ Նաֆտալի Բեննեթն արդեն հայտարարել է, որ միանալու է կոալիցիային: Մարտին տեղի ունեցած խորհրդարանական ընտրությունների արդյունքում Քնեսեթի տեղերը հավասարապես բաժանվել են աջ և ձախ կուսակցությունների միջև: «Յամինա»-ն 120 տեղանոց օրենսդիր մարմնում ունի ընդամենը 7 տեղ: Բայց սա բավարար է կոալիցիա կազմելու համար: Իսրայելի վարչապետ Բենյամին Նեթանյահուն նախազգուշացրել է, որ առաջարկվող նոր միասնության կառավարությունը «երկրի անվտանգության համար սպառնալիք» կլինի: Նա կոչ է արել աջակողմյան գործիչներին չսատարել այդ գործարքին:
Կո Լիպե կղզում մահացած են հայտնաբերել Թաիլանդում Ուկրաինայի դեսպան Անդրեյ Բեշտային: Ոստիկանությունից հայտնել են, որ մահվան ելքով բռնության հետքեր չեն հայտնաբերվել: Նախնական վարկածով՝ մահվան պատճառը սրտի կաթվածն է: Դեսպանի որդին, սակայն, պնդում է, որ հորը թունավորել են և Կիևից պահանջել է հետաքննություն սկսել Թաիլանդում հոր թունավորման վերաբերյալ: Անդրեյ Բեշտան Թայլանդում դեսպան էր նշանակվել 2015 թվականին:
Նիգերիայում 200 դպրոցականի են առևանգել զինված հարձակման ժամանակ: Նիգեր նահանգի իշխանությունները հաստատել են հարձակման լուրը: Միջադեպի ընթացքում հրաձգություն է եղել, որի հետևանքով զոհեր և վիրավորներ կան: Նիգերիայում անչափահասների մասսայական առևանգման դեպքեր վերջին տարիներին հաճախ են արձանագրվում: Հանցագործները երեխաներին վերադարձնելու դիմաց փրկագին են պահանջում: Կառավարության տվյալների համաձայն՝ այս տարվա սկզբից ավելի քան 700 աշակերտ և ուսանող է առևանգվել երկրի տարբեր շրջանների դպրոցներից ու համալսարաններից:
Բրազիլիայում տասնյակ հազարավոր ցուցարարներ պահանջում են նախագահի հրաժարականը: «Բոլսոնարու, հեռացիր» պաստառներով և վանկարկումներով՝ ցուցարարները կաթվածահար են արել մի շարք քաղաքներ՝ պահանջելով կորոնավիրուսի դեմ պայքարը ձախողած նախագահի հեռացումը: Բրազիլիայում COVID-19-ի վարակման առաջին դեպքը հայտնաբերվել էր 2020 թ. փետրվարին: Երկիրը վարակվածների թվով աշխարհում երրորդն է ԱՄՆ-ից և Հնդկաստանից հետո: Բրազիլիայում մինչ օրս կորոնավիրուսից մահացել է 461.142 մարդ:
