25 տարի է Հայաստանի և ԱՄՆ կառավարությունները գործակցում են՝ ջրային ոլորտի խնդիրները լուծելու նպատակով: Վերջին տասնամյակում Արարատյան դաշտի ստորերկրյա ջրերի մակարդակն իջել է 6-9 մետրով, արտեզյան գոտին կրճատվել է մոտ 67 տոկոսով:
Դեյվիդ Հոֆման, ԱՄՆ ՄԶԳ հայաստանյան առաքելության տնօրենի պաշտոնակատար - Ջուրն անչափ կարևոր ռեսուրս է ոչ միայն սոցիալական, այլև տնտեսական զարգացում ապահովելու համար: Ծրագրի նպատակն է համատեղ ծրագիր մշակել՝ Արարատյան դաշտում ջրերի կառավարումը բարելավելու համար:
Ստորերկրյա ջրառի ծավալների վերաբերյալ կառավարության որոշումները մինչև վերջերս 1983-84 թթ. տվյալների հիման վրա էին: «Գիտական առաջադեմ տեխնոլոգիաների օգտագործում» ծրագրի՝ 2016-ի տվյալներով՝ ստորերկրյա ջրային ռեսուրսներից ջրառի ծավալը 46 տոկոսով գերազանցում է թույլատրելի չափը:
Դեյվիդ Հոֆման - Ճիշտ քաղաքականություն դժվար է մշակել, եթե չունես ճշգրիտ տվյալներ: Մենք համատեղ մշակում ենք համակարգ, որը թույլ կտա պարբերաբար թարմացված տվյալներ ստանալ՝ օգտագործելով բարձր տեխնոլոգիաներ, այդ թվում՝ արբանյակ:
Ջրային պաշարների գերշահագործումը կանխելու և ջրօգտագործողների գործունեությունը կարգավորելու նպատակով Կառավարությունն ընդունել է օրենսդրական ակտեր: Նման իրավիճակի ենք հասել, որովհետև ջրօգտագործման թույլտվություն նախկինում տրվել է առանց լուրջ ուսումնասիրության՝ նշում է Բնապահպանական ծրագրերի ղեկավար Մարինա Վարդանյանը:
Մարինա Վարդանյան, ԱՄՆ ՄԶԳ հայաստանյան առաքելության բնապահպանական ծրագրերի ղեկավար - Ներկայումս խնդիր կա վերանայելու այն տվյալները, որոնք օգտագործվում են ջրօգտագործման թույլտվություն տալու համար: Եվ հիմնված այդ տվյալների վրա, վերանայվեն գուցե որոշ թույլտվություններ և որոշումներ ընդունվեն այնքան, ինչքան մատչելի ջուր կա օգտագործման համար:
Պաշարների հյուծման պատճառով՝ Արարատյան դաշտի ավելի քան 30 համայնք ունի խմելու և ոռոգման ջրի խնդիր: Ավազանի ջուրն օգտագործվում է նաև Մեծամորի ատոմակայանի հովացման համակարգի համար:
Մարինա Վարդանյան - Քայլ առ քայլ Կառավարությունը գնում է նրան, որ նվազեցնի գերշահագործումը: 45 տոկոսը փոքր թիվ չէ:
Վերջին տարիներին Արարատյան դաշտի ստորգետնյա ավազանից ջրօգտագործման թույլտվություններ տրվել են բացառիկ դեպքերում՝ այն էլ վերահսկողության պայմաններում: Մարինա Վարդանյանի խոսքով՝ չնայած ձեռնարկվող միջոցառումներին՝ անհրաժեշտ է, որ հասարակությունը գիտակից և ջրախնայող մոտեցում ցուցաբերի:
