Թուրքիայի նախագահ Թայիփ Էրդողանն ուրբաթ հայտարարել է, թե դրական արդյունք չի սպասում ՄԱԿ-ի կազմակերպած կիպրոսյան հանդիպումից, գրում է Reuters-ը:
Ապրիլի 29-ին ՄԱԿ-ը և Միջերկրական ծովի կղզու երեք երաշխավոր երկիր` Հունաստանը, Թուրքիան և Մեծ Բրիտանիան, չկարողացան վերացնել տարաձայնություններն այդ հարցում: ՄԱԿ-ի ղեկավար Անտոնիո Գուտերեշն ասել է, որ նոր բանակցություններ կլինեն երկու-երեք ամսից:
Էրդողանը չի թաքցրել, որ չի վստահում կիպրոսցի հույներին: Կիպրոսը չի կարողանում դուրս գալ կղզու հույն և թուրք համայնքների միջև տասնամյակներ շարունակվող պայքարից, չնայած համապարփակ կարգավորմանն ուղղված ՄԱԿ-ի մի շարք դիվանագիտական ջանքերին:
1974-ին Կիպրոսի հունական հեղաշրջումը, որի նպատակն էր կղզին միացնել Հունաստանին, հանգեցրեց Թուրքիայի ռազմական միջամտությանը՝ որպես երաշխավոր տերության Կիպրոսի թուրքական համայնքին: 1983 թվականին կղզու մեկ երրորդ հատվածում հիմնվեց Հյուսիսային Կիպրոսի Թուրքական Հանրապետությունը, որն առայժմ ճանաչել է միայն Անկարան:
