Պատվաստումն այս տարվա ամենակարևոր գործընթացն է, որը կնպաստի ինչպես այլ երկրների հետ մեր շփումների վերականգնմանը, այնպես էլ զբոսաշրջության զարգացմանը: Այդ մասին լրագրողների հետ ճեպազրույցում ասաց ՀՀ փոխվարչապետի պաշտոնակատար Տիգրան Ավինյանը՝ «Աստրազենեկա» պատվաստանյութով պատվաստվելուց հետո:
Նրա խոսքով՝ հանրային իրազեկման արշավի նպատակն է՝ համոզել մարդկանց պատվաստվել:
«Ես և տիկին Ավանեսյանը պատվաստվեցինք «Աստրազենեկա» պատվաստանյութով, երկրորդ չափաբաժինը կստանանք 2 ամիս հետո: Մենք հատուկ ենք ընտրել «Աստրազենեկան», քանի որ հենց այդ պատվաստանյութի մասին են ավելի շատ սուտ լուրեր տարածվում, մինչդեռ աշխարհում 200 մլն դեպքից մի քանի տասնյակն են միայն վատ ավարտ ունեցել: Պատվաստանյութը հասանելի է բոլոր պոլիկլինիկաներում՝ 18-ից բարձր քաղաքացիների համար»,- ասաց Ավինյանը:
.jpg)
Նա նշեց, որ փորձելու են ամեն ինչ անել պատվաստվողների մեծ թիվ ունենալու համար, ինչը կազդի ցուցանիշների նվազման վրա, ուստի Ավինյանը կոչ արեց քաղաքացիներին պատվաստվել՝ վստահեցնելով, որ ՀՀ-ում դրա համար բոլոր հնարավորությունները ստեղծված են:
«Պատվաստումը կարևոր կանխարգելիչ միջոցառում է, որ կօգնի հաղթահարել կորոնավիրուսը և, ի վերջո, վերադառնալ բնականոն կյանքի»,- պատվաստվելուց հետո լրագրողների հետ ճեպազրույցում ասաց առողջապահության նախարարի պաշտոնակատար Անահիտ Ավանեսյանը՝ նշելով, որ իրեն լավ է զգում և իր օրինակով ցանկացավ ցույց տալ, որ «Աստրազենեկան» նույնպես վստահելի պատվաստանյութ է:
.jpg)
«Մենք անընդհատ տագնապի վիճակում ենք, ամեն ալիքի հետ հիվանդության ծանր դեպքերի թիվն ավելանում է, ներմուծվում են նոր շտամներ, ուստի պետք է օր առաջ կանխենք հիվանդության տարածումը: Պետք է լայնացնենք պատվաստվողների շրջանակը, նրանք ապահովեն հանրային իմունիտետ, և մենք ցտեսություն կասենք այս արհավիրքին»,- նշեց նախարարի պաշտոնակատարը:
Ավանեսյանը տեղեկացրեց, որ մյուս շաբաթ Հայաստան կներմուծվի 50 հազար դեղաչափ չինական «Սինոֆարմ» պատվաստանյութը, որը նույնպես նախատեսված է 18 տարեկանից բարձր քաղաքացիների համար: Նրա խոսքով՝ «Սինոֆարմը» Հայաստանին տրամադրվել է անվճար՝ որպես նվեր, հայկական կողմն ապահովել է միայն դրա տեղափոխումը:
Նախարարի պաշտոնակատարը հայտնեց նաև, որ Հայաստանին առաջարկվել է «Նովովաքս» պատվաստանյութը, ինչին Կառավարությունը համաձայնություն է տվել, սակայն, ըստ Ավանեսյանի, գնի և մատակարարման ժամկետների վերաբերյալ վերջնական տեղեկություն դեռ չկա:
«Պետք է բոլորս պատասխանատու կերպով մոտենանք պատվաստանյութերին, վստահենք միայն փաստարկված և մասնագետների կողմից տրամադրված տեղեկությանը՝ չտրվելով մանիպուլյացիաներին: Պետությունը ֆինանսներ չի խնայելու պատվաստանյութ ձեռք բերելու համար, այլապես այդ գումարը մենք պետք է ծախսենք քաղաքացիների բուժման համար»,- ընդգծեց նա:
Նախարարի պաշտոնակատարը տեղեկացրեց, որ արդեն պատվաստվել է 2000-ից ավելի մարդ, ինչը դեռևս ցածր ցուցանիշ է:
