Հանրապետության նախագահ Արմեն Սարգսյանն այսօր ընդունել է Կիպրոսի Հանրապետության պաշտպանության նախարար Խարալամբոս Պետրիդեսին և նրա գլխավորած պատվիրակությանը:
Կիպրոսի պաշտպանության նախարարը նշել է, որ իր համար պատիվ է հայ ժողովրդի համար այս կարևոր օրը գտնվել Հայաստանում և հնարավորություն ունենալ հարգանքի տուրք մատուցել Հայոց ցեղասպանության զոհերի հիշատակին: «Եղել ենք Ցեղասպանության հուշահամալիրում և տպավորված ենք: Կիսում ենք բարեկամ հայ ժողովրդի ցավը և մեր աջակցությունը հայտնում»,- ասել է նախարար Պետրիդեսը:
Նախագահ Սարգսյանը շնորհակալության է հայտնել նախարար Պետրիդեսին և պատվիրակության անդամներին հայ ժողովրդի համար այս կարևորագույն օրը Հայաստան այցելելու և մեր ժողովրդի կողքին գտնվելու համար. «Մեր ժողովրդի համար սա մեծ ողբերգության՝ Հայոց ցեղասպանության հիշատակի օրն է, դուք այն ժողովուրդն եք, որը լավագույնս է մեզ հասկանում: Մենք ոչ միայն պետք է աջակցենք միմյանց, այլև, անցյալի դասերը քաղած, խորացնենք մեր փոխգործակցությունը»:
Նախագահը ողջունելի է համարել Հայաստանի և Կիպրոսի պաշտպանական գերատեսչությունների միջև համագործակցության զարգացմանն ուղղված քայլերը՝ ընդգծելով, որ մարտահրավերներին դիմակայելու համար պետք է պատրաստ լինել ամենօրյա ծանր աշխատանքի:
Նախագահ Սարգսյանն անդրադարձել է նաև Արցախի դեմ Թուրքիայի աջակցությամբ Ադրբեջանի սանձազերծած պատերազմին և դրա հետևանքներին: Խոսելով մարդասիրական խնդիրների մասին՝ նա ընդգծել է, որ պատերազմից ամիսներ անց Ադրբեջանը շարունակում է անազատության մեջ պահել հայ ռազմագերիներին ու քաղաքացիական անձանց՝ ոտնահարելով միջազգային իրավունքի բոլոր նորմերը:
Հանդիպմանը Հայաստանի նախագահն ու Կիպրոսի պաշտպանության նախարարը մտքեր են փոխանակել նաև տարածաշրջանային անվտանգության խնդիրների շուրջ:
