Հանրությանը Մհեր Արմենիա բեմական անունով հայտնի Մհեր Մեսրոպյանի «Ազգի ձայն» կուսակցության անդրանիկ համագումարը թեև մեկնարկեց մոտ մեկ ժամ ուշացումով, բայց այդպես էլ մոտ 300 հոգու համար նախատեսված դալիճում մարդկանց թիվը չգերազանցեց մեկ տասնյակը:
Նախապես հայտարարված էր, որ համագումարին հաստատվելու է կուսակցության կանոնադրությունը, ընտրվելու ղեկավար կազմը, ինչին, սակայն, ականատես չեղանք: Բեմից կարճ խոսքով ներկաներին դիմեց կուսակցության հիմնադիրը՝ պարզաբանելով, որ այդ ամենը կանեն ավելի ուշ՝ առանց լրագրողների, իսկ մինչև այդ պատրաստակամություն հայտնեց պատասխանել լրատվամիջոցների հարցերին:
Գործող օրենքով՝ կուսակցության ստեղծման մասին որոշումը համարվում է ընդունված, եթե դրան կողմ է քվեարկել հիմնադիր համագումարի մասնակիցների մեծամասնությունը, բայց ոչ պակաս, քան 300 հիմնադիր: Մոտ 5 ամիս առաջ փոխված օրենքի այս դրույթին Մհեր Արմենիան, պարզվում է, դեռ չի հասցրել ծանոթանալ:
Այդուհանդերձ, երգիչը վստահ է՝ իր ստեղծած կուսակցությամբ առաջիկա ընտրություններին հաղթելու է՝ ստանձնելով երկրի կառավարումը: Քաղաքական դաշտում էլ արդեն հասցրել է գաղափարկից ձեռք բերել, ՍԻՄ կուսակցության նախագահ Հայկ Բաբուխանյանը մասնակիցների առաջին շարքում էր: Դաշինք կկազմեն, թե չէ, դեռ պարզ չէ: Փոխարենը պարզ է, թե որն է Մհեր Արմենիայի քաղաքականությամբ զբաղվելու որոշման պատճառը:
36 կետից բաղկացած կուսակցության ծրագրի մի շարք կետեր նվիրված են Ռուսաստանի հետ հարաբերություններին: Պետք է միութենական պետություն ստեղծել, բացել նոր ուսումնական հաստատություններ՝ ամբողջությամբ ռուսական ուսումնառությամբ, ավելացնել ռուսաց լեզվի ժամերի քանակը:
Ծրագրում տրված են հնարավոր բոլոր խոստումները: Մհեր Արմենիան վստահեցնում է՝ կան գործարարներ, որոնց ֆինանսական աջակցությամբ էլ այդ ամենը կյանքի կկոչեն: Թե ովքեր են այդ անձինք, չի պատրաստվում անուններ հնչեցնել: Միայն վստահեցնում է՝ ամեն ինչ արդեն ծրագրված է: Կուսակցությունը ֆինանսավորողների անունները ևս հրաժարվում է հայտնել:
Թեև կուսակցությունը դեռ գրանցված չէ, սակայն որոշված է նաև կուսակցության նախընտրական կարգախոսը՝ «Հաղթենք, որ չգաղթենք»:
