Ռումինիայում ՀՀ դեսպան Սերգեյ Մինասյանը հանդիպել է Ալբա Յուլիայի ռոմանո-կաթոլիկ արքեպիսկոպոս, Ռումինիայի հայ կաթոլիկ համայնքի առաքելական առաջնորդ դոկտոր Կովաչ Գերգեյին (Kovács Gergely):
Շնորհավորելով դոկտոր Գերգեյին Ռումինիայի հայ կաթոլիկ համայնքի առաքելական առաջնորդի պաշտոնում նշանակվելու կապակցությամբ՝ դեսպան Մինասյանը հույս է հայտնել, որ նորանշանակ առաջնորդը նոր լիցք կհաղորդի Ռումինիայում բնակվող հայ կաթոլիկ համայնքի հոգևոր կյանքին ու ինքնության պահպանմանը, ինչպես նաև Տրանսիլվանիայի հայ կաթոլիկ համայնքի՝ իր պատմական Հայրենիքի հետ կապերի զարգացմանը:
Հանդիպման ընթացքում կողմերը քննարկել են նաև Տրանսիլվանիայի հայ կաթոլիկ համայնքին առնչվող հարցերի լայն շրջանակ՝ անդրադառնալով, մասնավորապես, պատմամշակութային և հոգևոր-կրոնական ժառանգության պահպանմանը:
Զրուցակիցները մանրամասն քննարկել են անցյալ տարի աշնանն Արցախի դեմ Թուրքիայի աջակցությամբ Ադրբեջանի սանձազերծած ագրեսիային, դրա քաղաքական և հումանիտար հետևանքներին: Երկուստեք ընդգծվել է նաև Արցախի պատմական ու եկեղեցական ժառանգության պահպանման կարևորությունը, ադրբեջանական իշխանությունների կողմից հայկական եկեղեցական ժառանգության յուրացման քաղաքականության անթույլատրելիությունը:
Անդրադառնալով Ադրբեջանում պահվող հայ ռազմագերիների անհապաղ ազատման անհրաժեշտությանը՝ կողմերը հատուկ ընդգծել են Սուրբ Հարության տոնի առթիվ Հռոմի Պապ Ֆրանցիսկոսի ամենամյա «Քաղաքին և աշխարհին» ուղերձում այդ հարցին անդրադառնալու կարևորությունը:
