Այսօր Արտակարգ իրավիճակների նախարարության Փրկարար ծառայությունն ամփոփել է մեկ ամսվա գործունեությունը: Զեկույցներով են հանդես եկել ԱԻՆ ՓԾ տնօրեն, գնդապետ Արմեն Գասպարյանը, ՓԾ կադրերի վարչության պետի պաշտոնակատար Արման Կարապետյանը, ՓԾ Հոգեբանական աջակցության բաժնի պետ Արևիկ Երիցյանը, Երևանի և մարզային փրկարարական վարչությունների պետերը: Փրկարար ծառայության կառուցվածքային և տարածքային ստորաբաժանումների ղեկավարները ներկայացրել են հաշվետու ժամանակահատվածում իրականացված աշխատանքները և ի հայտ եկած խնդիրների լուծման տարբերակները:
Նշվել է նաև, որ ՓԾ տարածքային մարմինների աշխատանքի արդյունավետության բարձրացման նպատակով՝ քննարկվում են վերջիններիս լիազորությունների շրջանակն ընդլայնելու իրավական կարգավորումները:
Նախարար Անդրանիկ Փիլոյանը շնորհակալություն է հայտնել տարածքային ստորաբաժանումներին՝ ձմռան սեզոնային դժվարություններով պայմանավորված աշխատանքները հավուր պատշաճի կատարելու համար: Նա նաև հանձնարարել է հետևել սելավատարների մաքրմանը, լրացուցիչ աշխատանքներ տանել հեղեղումներից խուսափելու համար, ինչպես նաև խիստ հսկողություն սահմանել՝ գյուղատնտեսական աշխատանքների հետևանքով հնարավոր հրդեհների դեպքերը կանխելու նպատակով:
Խորհրդակցության ավարտին պարգևատրման արարողություն է իրականացվել: Արցախի Հանրապետության քննչական կոմիտեի նախագահի հրամանով ԱԻՆ Փրկարար ծառայության տնօրեն, գնդապետ Արմեն Գասպարյանը պարգևատրվել է «Համագործակցության համար» մեդալով: Ռուսաստանի Դաշնության քաղաքացիական պաշտպանության, արտակարգ իրավիճակների և աղետների հետևանքների վերացման նախարարի հրամանի համաձայն՝ ՌԴ ԱԻՆ 30-ամյակի մեդալով են պարգևատրվել ՀՀ արտակարգ իրավիճակների նախարարի տեղակալ Արկադի Բալյանը, ԱԻՆ գլխավոր քարտուղար Վահագն Օհանյանը, փ/ծ գնդապետ Տիգրան Պետրոսյանը, փ/ծ գնդապետ Արմեն Գևորգյանը, փ/ծ գնդապետ Հայկ Նաղդալյանը, փ/ծ գնդապետ Սարգիս Կյուրեղյանը, փ/ծ փոխգնդապետ Լևոն Փալայանը, փ/ծ մայոր Խաչիկ Ցոգոլակյանը, փ/ծ կապիտան Էմիլ Գաբրիելյանը և փ/ծ կապիտան Կարեն Մաթևոսյանը:
