Հանրահայտ դաշնակահար Սվետլանա Նավասարդյանը և Armenian լարային քառյակը հանդես կգան Մոցարտի ծննդյան 265-ամյակին նվիրված համերգով: Համերգը կանցկացվի մարտի 29-ին՝ ժամը 19:00-ին, Կոմիտասի անվան կամերային երաժշտության տանը: Երեկոյին կներկայացվեն Մոցարտի ստեղծագործությունները:
Դաշնակահար Սվետլանա Նավասարդյանը համերգային ծրագրերով եղել է աշխարհի բազմաթիվ երկրներում, մասնակցել Փարիզի, Գրանադայի, Էխտեռնախի (Լյուքսեմբուրգ), Վենետիկի միջազգային փառատոներին, եղել միջազգային մրցույթների ժյուրիի անդամ: Նվագացանկն ընդգրկում է Յ.Բախի, Լ.Բեթհովենի, Ռ.Շումանի, Պ.Հինդեմիթի, Դ.Շոստակովիչի, Ա.Խաչատրյանի, Ա.Բաբաջանյանի, Գ.Հովունցի, Տ.Մանսուրյանի և այլ կոմպոզիտորների ստեղծագործությունները: Նրա կատարումներն աչքի են ընկնում ուրույն մեկնաբանությամբ, մասշտաբայնությամբ, դրամատիկ հագեցվածությամբ: 1977 թ. արժանացել է Հայաստանի վաստակավոր, 1984 թ.՝ ժողովրդական արտիստի կոչման, 1988 թ.՝ ՀՀ Պետական մրցանակի: 2003 թ. պարգևատրվել է ՀՀ «Մովսես Խորենացի», 2010 թ.՝ ՀՀ «Մեսրոպ Մաշտոց», 2016 թ.՝ ՀՀ Պատվո շքանշաններով:
Armenian լարային քառյակի կազմում հանդես են գալիս Աստղիկ Վարդանյանը (ջութակ), Ռազմիկ Հովհաննիսյանը (ջութակ), Վահագն Եղիշյանը (ալտ) և Հակոբ Աթյանը (թավջութակ): Այս երիտասարդ երաժիշտները 2018 թ.-ից միավորվել են քառյակի կազմում, նպատակ ունենալով ակտիվ գործունեություն ծավալել կամերային երաժշտության ասպարեզում: Քառյակի դեբյուտը տեղի է ունեցել բարեգործական համերգաշարով`«Լույս հայի աչքերին» խորագրի ներքո, հաջակցություն «Հայկական ակնաբուժության ծրագիր» բարեգործական հիմնադրամի: Քառյակը հանդես է եկել բազում համերգներով Հայաստանում և արտերկրում:
