Տեղի է ունեցել Եվրոպական դեղերի գործակալության Դեղագիտության ռիսկերի գնահատման հանձնաժողովի արտահերթ նիստը, որտեղ քննարկվել են AstraZeneca պատվաստանյութով պատվաստված անձանց շրջանում արյան մակարդելիության խանգարումների հետ կապված առկա տվյալները՝ հայտնում են ՀՀ ԱՆ-ից:
Հանձնաժողովը հաստատել է, որ՝
-
COVID-19-ի լայնորեն տարածման պարագայում պատվաստանյութի օգուտները շարունակում են գերազանցել ռիսկերը.
-
պատվաստանյութը կապված չէ արյան թրոմբոէմբոլիաների առաջացման ընդհանուր ռիսկի ավելացման հետ.
-
չկա ապացույց պատվաստանյութի որոշակի խմբաքանակի կամ արտադրական որոշակի խնդիրների վերաբերյալ.
-
այնուամենայնիվ, պատվաստանյութը կարող է կապված լինել շատ հազվադեպ հանդիպող թրոմբոցիտոպենիաների հետ. թրոմբոցիտների ցածր մակարդակ՝ արյունահոսությամբ կամ առանց արյունահոսության, հազվադեպ` ներառելով ուղեղի անոթներում թրոմբի առաջացումը:
Միացյալ Թագավորությունում և եվրոպական երկրներում մարտի 16-ի դրությամբ պատվաստվել է ավելի քան 20 մլն անձ, որոնցից դիտվել է տարածուն ներանոթային մակարդելիության համախտանիշի միայն 7 դեպք և ուղեղի անոթներում թրոմբի առաջացման 18 դեպք: Այս դեպքերի և պատվաստանյութի միջև պատճառահետևանքային կապն ապացուցված չէ, բայց անհրաժեշտ է շարունակել հետագա ուսումնասիրությունները:
Եվրոպական դեղերի գործակալության Դեղագիտության ռիսկերի գնահատման հանձնաժողովն իր հետազոտություններին ներգրավել է նաև արյան հիվանդությունների մասնագետների և սերտորեն համագործակցել է առողջապահական այլ մարմինների հետ, ներառյալ` Մեծ Բրիտանիայի առողջապահական կանոնակարգող կազմակերպությունների հետ:
Ընդհանուր առմամբ, պատվաստումից հետո արձանագրված թրոմբոէմբոլիաների քանակը շատ ավելի ցածր է, քան ակնկալվում էր բնակչության ընդհանուր պոպուլյացիայում:
Դա հնարավորություն է տալիս Եվրոպական դեղերի գործակալության Դեղագիտության ռիսկերի գնահատման հանձնաժողովին հաստատելու, որ թրոմբոէմբոլիաների առաջացման ռիսկի աճ չկա:
(հղում՝ https://www.ema.europa.eu/en/news/covid-19-vaccine-astrazeneca-benefits-still-outweigh-risks-despite-possible-link-rare-blood-clots)
