Արձագանքելով ՄԱԿ-ի Մարդու իրավունքների խորհրդի հակաիրանական բանաձևին՝ Իրանի ԱԳՆ խոսնակը հայտարարել է՝ ազգերի իրավունքները ոտնահարող երկրները չեն կարող խոսել մարդու իրավունքներից: Սաիդ Խաթիբզադեն հավելել է, թե բանաձևի կողմնակիցները, որպես առաջին քայլ, պետք է դատապարտեն, իր բնորոշմամբ, ԱՄՆ-ի իրականացրած տնտեսական ահաբեկչությունը և միակողմանի ու ճնշող պատժամիջոցները, հատկապես՝ կորոնավիրուսի համավարակի պայմաններում, քանի որ դրանք խոչընդոտեցին բժշկական սարքավորումների և անհրաժեշտ պարագաների հասանելիությանը:
Ֆրանսիայի նախագահ Էմանուել Մակրոնը անհրաժեշտ է համարել ՆԱՏՕ-ում Թուրքիայի դերի հստակեցումը: Նա միաժամանակ կարևոր է համարել Անկարայի հետ երկխոսությունը՝ հատկապես միգրացիայի և անվտանգության հարցերով: Ֆրանսիայի ղեկավարի խոսքով՝ դաշնակիցների հետ հարաբերություններում սովորաբար չեն անում այն, ինչն իրեն վերջին ամիսներին թույլ էր տալիս Թուրքիան: Մակրոնն ամեն դեպքում շեշտել է՝ պետք է անել հնարավորը, որ Թուրքիան մեջքով չշրջվի դեպի Եվրոպան և չշարժվի կրոնական ծայրահեղականության ուղղությամբ կամ էլ ստիպված լինի աշխարհաքաղաքական ընտրություն կատարել: Դա, Մակրոնի համոզմամբ, ավելի վտանգավոր կարող է լինել եվրոպացիների համար:
Իսրայելում երեկ տեղի ունեցած արտահերթ խորհրդարանական ընտրություններում առաջատարը իշխող «Լիկուդ» կուսակցությունն է. էքզիթ-փոլի արդյունքով՝ վարչապետ Բենիամին Նեթանյահուի ղեկավարած կուսակցությունը հաղթում է ընտրություններում և կարող է հավակնել Քնեսեթի 120 տեղից 31-ին: Նեթանյահուն շնորհակալություն է հայտնել իրենց օգտին քվեարկելու համար: Իսրայելի արտահերթ խորհրդարանական ընտրություններին մասնակցել է քվեարկելու իրավունք ունեցողների 67.2%-ը: Այն վերջին երկու տարում Իսրայելում անցկացված 4-րդ խորհրդարանական ընտրությունն է:
Աշխարհում կորոնավիրուսով վարակման նոր դեպքերն անցած 7 օրում ավելացել են: Մեկ շաբաթում կորոնավիրուսով վարակման ավելի քան 3.2 միլիոն նոր դեպք է հաստատվել: Առողջապահության համաշխարհային կազմակերպությունը հայտարարել է, որ հիվանդացությունն աճել է 8, մահացությունը՝ 3 տոկոսով: Վերջին մեկ շաբաթում կորոնավիրուսի հետևանքով աշխարհում ավելի քան 60 հազար մարդ է մահացել: Եվրոպայում կորոնավիրուսային վարակի տարածումը կսաստկանա, և այդ միտումը կշարունակվի հաջորդ շաբաթներին՝ հայտարարել է ԱՀԿ Եվրոպայի տարածաշրջանային բյուրոյի տնօրենը: Հանս Կլյուգեն նշել է, որ իրավիճակը հնարավոր Է փոխել, եթե պատվաստումն ընթանա ավելի արագ, եթե մարդիկ ավելի շատ օգտագործեն պաշտպանական դիմակներ:
Աշխարհի ամենամեծ կտավը վաճառվել է 62 մլն դոլարով։ Հեղինակը բրիտանացի նկարիչ Սաշա Ջաֆրին է, ստեղծագործությունը կոչվում է Մարդկության ճանապարհորդություն: Նկարի չափը հավասար է ֆուտբոլային երկու խաղադաշտի մակերեսին: Ջաֆրին իր ստեղծագործության վրա Դուբայի Ատլանտիս հյուրանոցում աշխատել է ութ ամիս՝ օրական 20 ժամ: Բրիտանացին հայտնել է, որ նկարի վաճառքից գոյացած գումարը տրամադրելու է ՅՈՒՆԵՍԿՕ-ին, ՅՈՒՆԻՍԵՖ-ին և այլ բարեգործական ծրագրերին, որոնք զբաղված են երեխաներին օգնելով:
