Բարձր տեխնոլոգիական արդյունաբերության նախարար Հակոբ Արշակյանը Ֆեյսբուքի էջում գրառում է կատարել՝ անդրադառնալով իր և լրագրող Փայլակ Ֆահրադյանի միջև տեղի ունեցած միջադեպին:
«Սիրելի՛ հայրենակիցներ, միջադեպի հետ կապված նախ և առաջ ցանկանում եմ հայտնել, որ դեմ եմ ցանկացած բռնության և առաջնորդվում եմ հարցերի քաղաքակիրթ մեթոդներով լուծման սկզբունքով։
Յուրաքանչյուր քաղաքացի ունի անձնական և ընտանեկան կյանքի անձեռնմխելիության իրավունք։ Մեր հասարակության ցանկացած մասնակից, լինի պաշտոնյա, թե լրագրող, առաջին հերթին մարդ է, ունի էմոցիաներ և նրբանկատ է հատկապես ընտանիքին վերաբերվող ցանկացած հարցում։
Ցանկանում եմ ներողություն խնդրել միջադեպին ներկա բոլոր քաղաքացիներից, բոլոր նրանցից, ում հանգիստն իմ արարքով խաթարել եմ։ Վերջում ցանկանում եմ նշել, որ պատրաստ եմ կրել պատասխանատվություն միջադեպի կապակցությամբ»,- գրել է նախարարը։
Ավելի վաղ լրագրող Փայլակ Ֆահրադյանը ֆեյսբուքի ուղիղ եթերում հայտնել էր, որ Հակոբ Արշակյանը սրճարանում հարձակվել է իր վրա այն բանից հետո, երբ ինքը ցանկացել է ճշտել, թե ինչու է նախարարն աշխատանքային ժամին սրճարանում:
