ԱԺ պատգամավոր Արման Բաբաջանյանի ղեկավարած «Հանուն Հանրապետության» կուսակցությունը ողջունել է արտահերթ ընտրություններ անցկացնելու մասին իշխանությունների որոշումը:
««Հանուն Հանրապետության» կուսակցությունը ողջունում է ձեռք բերված համաձայնությունը 2021-ի հունիսի 20-ին արտահերթ ընտրություններ անցկացնելու վերաբերյալ։ Մեր հայրենիքին պատուհասած ներքաղաքական և արտաքին քաղաքական մարտահրավերներն ու ճգնաժամերը հաղթահարելու գործուն միջոցը համարում ենք բացառապես սահմանադրական ճանապարհով հաղթահարելու այլընտրանք չունեցող այս ընթացքը։
Միաժամանակ գտնում ենք, որ ՀՀ քաղաքացու իրական կամարտահայտման կարևորագույն նախադրյալը բարեփոխված ընտրական համակարգով ընտրությունների կայացումն է։ Միայն այս դեպքում կարելի է երաշխավորել հետընտրական քաղաքական իրականությունում քաղաքական ուժերի՝ հասարակական տրամադրություններին և համակրանքին համապատասխանող հարաբերակցության հաստատումը։ Միայն բարեփոխված ընտրական համակարգը հնարավորություն կտա քաղաքական դաշտի դերակատարներին ստանալ լեգիտիմության այն պաշարը, որի միջոցով կիրացվեն և ավարտին կհասցվեն 2018 թվականին հայ ժողովրդի արժեքային սպասումները։
Քաղաքական դաշտի բոլոր դերակատարներին, մեր բոլոր ըննդիմախոսներին և պոտենցիալ գործընկերներին հորդորում ենք լծվել ստեղծարար, քաղաքական, միմյանց նկատմամբ հանդուրժող և ատելության խոսքից զերծ քարոզարշավի։
Դիմում ենք մեր ողջ ժողովրդին՝ վաղվա օրվա հանդեպ լցվել հավատով, մասնակցել քարոզարշավին և ակտիվորեն մասնակցել ընտրություններին»,- ասված է հայտարարության մեջ։
