Այսօր սպարապետ Վազգեն Սարգսյանի ծննդյան օրն է: Նա կդառնար 62 տարեկան:
Վազգեն Սարգսյանը ծնվել է 1959 թ. մարտի 5-ին Արարատի մարզի Արարատ գյուղում:
1979 թ. ավարտել է Երևանի ֆիզիկական կուլտուրայի ինստիտուտը:
1979-1983 թթ. որպես ֆիզկուլտուրայի ուսուցիչ աշխատել է հայրենի գյուղի միջնակարգ դպրոցում:
1983-1986 թթ. եղել է Արարատի ցեմենտի գործարանի կոմերիտական կազմակերպության քարտուղարը:
1986-1989 թթ. աշխատել է «Գարուն» ամսագրի խմբագրությունում որպես հրապարակախոսության բաժնի վարիչ:
1988-ին, երբ Ադրբեջանը արցախահայության արդար պահանջին Սումգայիթի ջարդեր հակադրեց, Վազգենը առաջիններից մեկը գիտակցեց, որ հրապարակներում հանրահավաքներ անցկացնելուց ավելի կարևոր է ինքնապաշտպանություն կազմակերպելը: Նա միավորեց երկրապահ կամավորական ջոկատները և Երկրապահ կամավորականների միության հիմնադիր նախագահը դարձավ: Սպարապետ Վազգեն Սարգսյանը նաև կանոնավոր բանակի՛ առաջին հրամանատարն է՝ Հայաստանի պաշտպանության առաջին նախարարը: Կամավորականների հիմքով Վազգենի հիմնած հայոց բանակը 1994-ի մայիսի 12-ին կարողացավ մեզ պատերազմ պարտադրած հակառակորդին հրադադար պարտադրել:
1990-1992 թթ. եղել է «Երկրապահ» կամավորական խմբերի հրամանատար, նաև` ՀՀ Գերագույն խորհրդի պաշտպանության և ներքին գործերի մշտական հանձնաժողովի նախագահ:
1992-1993 թթ. ՀՀ առաջին պաշտպանության նախարար, ՀՀ նախագահի պաշտպանության հարցերով խորհրդական, ՀՀ սահմանամերձ շրջաններում ՀՀ նախագահի ներկայացուցիչ:
1993-1995 թթ. ՀՀ պետնախարար:
26.07.1995-25.05.1999 կրկին եղել է ՀՀ պաշտպանության նախարար:
1999-ի խորհրդարանի ընտրություններում Կարեն Դեմիրճյանի և Վազգեն Սարգսյանի ստեղծած «Միասնություն» դաշինքը հաղթեց
1999 թ. հունիսի 11-ից Վազգեն Սարգսյանը դարձավ ՀՀ վարչապետ:
1999 թ. հոկտեմբերի 27-ին ՀՀ ԱԺ նիստերի դահլիճում դարձել է ահաբեկչության զոհ:Թաղված է «Եռաբլուր» զինվորական պանթեոնում:
Արցախի հերոս է (1998): Պարգևատրվել է «Ոսկե արծիվ» շքանշանով: Հայաստանի ազգային հերոս է (27.12.1999, հետմահու): Անուրանալի է նրա դերը Հայոց ազգային բանակի ստեղծման գործում: Մեծ է դերը նաև Հայոց պետականության կերտման գործում: Ժողովուրդը Վազգեն Սարգսյանին տվել է «Սպարապետ» պատվանունը: 2000 թ. նրա անունով ՀՀ-ում և ԼՂՀ-ում անվանակոչվել են փողոցներ, դպրոցներ, ՀՀ ՊՆ ռազմական ինստիտուտը, զորամասեր:
