Փետրվարի 21-28-ը Բուլղարիայի մայրաքաղաք Սոֆիայում տեղի է ունեցել բռնցքամարտի Ստրանջայի 72-րդ միջազգային մրցաշարը, որին մասնակցել է 30 երկրի շուրջ 220 բռնցքամարտիկ: Այս մասին հայտնում են ՀՀ ԿԳՄՍ նախարարությունից:
Եվրոպական բռնցքամարտի ամենահին մրցաշարում Հայաստանի ներկայացուցիչները 4 մեդալ են նվաճել՝ 1 արծաթե, 3 բրոնզե: 91 կգ քաշային կարգում Նարեկ Մանասյանը հիանալի ելույթներ է ունեցել. նա 3 տպավորիչ հաղթանակ է տոնել և պարտվել միայն եզրափակչում:
Վճռորոշ մենամարտում Մանասյանը զիջել է մրցաշարը հյուրընկալող երկրի ներկայացուցիչ Ռադոսլավ Պանտալևին՝ դառնալով արծաթե մեդալակիր: 63 կգ քաշային կարգում Բենիկ Նիկողոսյանը Չեխիայի և ԱՄՆ-ի ներկայացուցիչների դեմ հաղթական մենամարտերից հետո պարտվել է Ռուսաստանի ներկայացուցիչ Իլյա Պոպովին՝ դառնալով բրոնզե մեդալակիր:
Եվրոպական խաղերի բրոնզե մեդալակիր Գոռ Ներսիսյանը (81 կգ) ևս երկու հաղթական մենամարտերից հետո պարտվել է կիսաեզրափակչում. զիջելով Ռուսաստանի ներկայացուցիչ Ռուսլան Կոլսենիկովին՝ Ներսիսյանը բավարարվել է երրորդ մրցանակով:
+91 կգ քաշային կարգում Գուրգեն Հովհաննիսյանն էլ կիսաեզրափակչում պարտվել է Ուզբեկստանի ներկայացուցիչ Բախոդիր Յալոլովին, որը հետագայում դարձել է մրցաշարի չեմպիոն:
Հավելենք՝ Ստրանջայի ստուգատեսից հետո հայ բռնցքամարտիկները նախապատրաստվելու են Օլիմպիական խաղերի համար վարկանիշային մրցաշարերին:
Հիշեցնենք, որ հայ բռնցքամարտիկներից առայժմ օլիմպիական ուղեգիր է նվաճել միայն 52 կգ քաշային Կորյուն Սողոմոնյանը։
