«Հայրենիքի փրկության շարժման» աջակիցները գիշերն անցկացրել են Բաղրամյան պողոտայում՝ երեկ երեկոյան տեղադրված վրաններում:
Երեկ Ազատության հրապարակում կայացած հանրահավաքից հետո ընդդիմության կողմնակիցները երթով շարժվել են դեպի Ազգային ժողով: Ընդդիմության վարչապետի թեկնածուն անդրադարձել է Նիկոլ Փաշինյանի այն հայտարարությանը, որ պատրաստ են կոնսուլտացիաների նաև իշխանության հասցեին ամենասուր քննադատությունը հնչեցնող քաղաքական ուժերի հետ: Վազգեն Մանուկյանն ասել է, որ Նիկոլ Փաշինյանի հետ խոսելու մեկ բան ունեն՝ նրա հրաժարականը:
Վաղ առավոտյան Վազգեն Մանուկյանը եկել է Բաղրամյան պողոտա, վստահեցրել՝ գիշերը որևէ սադրանք չի եղել: Նա նշել է, որ սպասելու են ԱԺ խորհրդի նիստին, որը պետք է բավարարի խորհրդարանական ընդդիմության՝ արտահերթ նիստ հրավիրելու պահանջը: Մանուկյանն ասել է, որ օրվա ընթացքում նաև երթեր են նախատեսված:
