ԱԺ պաշտպանության և անվտանգության հարցերի մշտական հանձնաժողովը երկրորդ ընթերցմամբ քննարկեց «Զենքի մասին» օրենքում լրացում կատարելու մասին նախագիծը:
Հիմնական զեկուցող, ՊԵԿ նախագահի տեղակալ Արշակ Գասպարյանը նշեց, որ նախագծի մշակումը պայմանավորված է ՀՀ պետական եկամուտների կոմիտեին մարտական զենքի տրամադրման անհրաժեշտությամբ, որը կօգտագործվի օպերատիվ-ծառայողական խնդիրների լուծման համար:
Օպերատիվ-հետախուզական գործունեության նպատակներն են՝ մաքսանենգության, ինչպես նաև Հայաստանի մաքսային սահմանով տրանսպորտային միջոցների ապօրինի տեղափոխման խափանումն ու բացահայտումը:
ՊԵԿ փոխնախագահն ասաց, որ օրենքով իրենց վերապահված լիազորությունների շրջանակում օպերատիվ-հետախուզական գործունեություն իրականացնելու իրավունք ունեն հարկային մարմինները և մաքսային մարմինները՝ մաքսանենգության և այլ հանցագործությունների խափանման ու բացահայտման նպատակով:
Նշենք՝ «Զենքի մասին» ՀՀ օրենքում փոփոխությունների նախագիծն ԱԺ լիագումար նիստում առաջին ընթերցմամբ ընդունվել էր 84 կողմ և 3 ձեռնպահ ձայներով:
