Հայաստանի եզդիական համայնքը նոր առաջնորդ ունի. 31-ամյա Խդր Հաջոյանը մինչև այս «Էզդիխանա» թերթն է խմբագրել, զբաղվել մշակութային ու կրոնական հարցերով: Ազիզ Թամոյանի մահից հետո եզդիները քննարկել ու որոշել են՝ իրենց ապագան նրա թոռան ձեռքում է:
Խդր Հաջոյան, Եզդիների ազգային միության նախագահ - Այսօր, բնականաբար, անձի ընտրություն չէր: Ես կարող եմ միանշանակ ասել, որ այսօր ընտրվել է եզդիների կրոնի պաշտպանությունը, այսօր ընտրվել է եզդիների մշակույթի պահպանությունը, եզդի ժողովրդի ապագան:
Նախագահի միակ թեկնածուն մասնագիտությամբ իրավաբան է: Ավարտել է Երևանի Պետական համալսարանը: Եզդիների հոգևոր առաջնորդն ընդգծում է՝ Հաջոյանն այն մարդն է, որը կարող է իր ուսերին պատասխանատվություն վերցնել: Ինքն էլ ինչով կարող է կօգնի երիտասարդ նախագահին, որ կայանա ու կարողանա բարդագույն խնդիրները կարգավորել:
Շեյխ Բրո Հասանյան, Եզդիների հոգևոր առաջնորդ - Մենք մեծ հույս ունենք, որ Խդր Հաջոյանը կշարունակի այն ծառայությունը և այն ճանապարհով կգնա, որը հարիր է եզդի ժողովրդին: Ուրիշ թեկնածու չլինելն ապացույցն է, որ եզդի ազգը լիովին վստահում է իր ճակատագիրը, իր ժողովրդի ապագան այն երիտասարդին, որն անցել է այդ ուղին և ունի բավարար բարձրագույն գիտելիքներ:
Եզդիների ազգային միության նորընտրիր նախագահն իրենց ապագան լուսավոր է պատկերացնում: Ասում է՝ անլուծելի խնդիրներ չկան: Առաջնահերթ՝ եզդիների մասին կարծրատիպերը կփորձի կոտրել, հետո կկարգավորի կրթական ու մշակութային հարցերը: Խդր Հաջոյանն աշխարհի բոլոր եզդիների միասնականության մեջ է խնդիրների լուծումը տեսնում:
Խդր Հաջոյան - Շատ ծրագրեր ունենք: Ամբողջ աշխարհի կողմից եզդիներին որպես էթնիկ ազգ ճանաչելը, իհարկե, ՀՀ-ն որպես այդպիսին առաջին երկիրն էր, որը ճանաչեց, մեր հետագա գործընթացն այս հարցերի շուրջ է լինելու:
83-ամյա Ազիզ Թամոյանը, որ վախճանվեց հունվարի 2-ին, իր ողջ կյանքը նվիրել է եզդի ազգի ինքնության պահպանմանը: 33 տարի ղեկավարելով եզդիների ազգային միությունը՝ Թամոյանը նպաստել է հայ-եզդիական բարեկամության ամրապնդմանը: Թոռն էլ խոստանում է, որ նույն ոգով կշարունակի իրագործել պապի կիսատ թողած գործերը:
