Արցախի ԱԺ-ից հայտնում են, որ խորհրդարանի ֆինանսաբյուջետային և տնտեսական կառավարման հանձնաժողովը հաստատել է հարկային արտոնություններին առնչվող օրենքների նախագծերում փոփոխություններ և լրացումներ կատարելու որոշումը:
Հանձնաժողովը լրացուցիչ առաջարկել է «Հարկերի մասին» օրենքում նախատեսել դրույթ, համաձայն որի կազմակերպությունների և անհատ ձեռնարկատերերի կողմից վճարված հարկերի 50 տոկոսը կուղղվի նրանց կողմից մինչև 2020 թվականի հոկտեմբերի 1-ը ստացված վարկերի փոխառությունների և դրանց սպասարակման համար վճարված տոկոսների փոխհատուցմանը: Վերադարձը կիրականացվի եռամսյակային կամ կիսամյակային պարբերականությամբ՝ երեք տարի ժամկետով:
Ըստ նախնական հաշվարկի՝ հարկային արտոնություններից կօգտվի շուրջ 4600 հարկ վճարող՝ 10,7 մլրդ դրամ գումարի չափով, նշված է հաղորդագրությունում:
Նախագծի դրույթները կիրառելի չեն լինի վարկային կազմակերպությունների, բանկերի, օգտակար հանածոների արդյունահանման, էլեկտրաէներգիայի և բնական գազի հաղորդման գործունեություններ իրականացնող անձանց համար:
Պատերազմական գործողությունների հետևանքով հարկային արտոնություններ սահմանելու մասին օրենքի նախագծով առաջարկվում է նաև գույքահարկի և հողի հարկի հաշվարկների ներկայացման և վճարման ժամկետները երկարաձգել մինչև 2021 թ. փետրվարի 20-ը, կազմակերպությունների և ֆիզիկական անձանց պատկանող՝ Ադրբեջանի կողմից օկուպացված տարածքներում գտնվող անշարժ և շարժական գույքերի և հողամասերի մասով կուտակված գույքահարկի և հողի հարկի պարտավորությունները զրոյացնել:
