Թեհրանը բողոքի նոտա է հղել Մոսկվային: Առիթը Ռուսաստանի արտգործնախարարության թվիթերյան էջի արաբալեզու գրառումն է, որում կա «Արաբական ծոց» ձևակերպումը։ Իրանը ջրային այդ տարածքի անունը ճանաչում է բացառապես «Պարսից ծոց» անվանմամբ և չի ընդունում «Արաբական ծոց» կամ միայն «Ծոց» անունները, քանի որ դրանք համարում է պատմական անվանը չհամապատասխանող:
Վերջին մեկ օրում աշխարհում ավելի քան 432 հազար մարդ է վարակվել կորոնավիրուսով: Առողջապահության համաշխարհային կազմակերպությունը հայտարարել է, որ մեկ օրում վիրուսի հետևանքով մահերի թիվն ավելացել է 11.752-ով: Մինչև օրս աշխարհում ավելի քան 2 միլիոն 300 հազար մարդ է մահացել Քովիդ-19-ից: Ուհանում կորոնավիրուսի ծագման պատճառներն ուսումնասիրող Առողջապահության համաշխարհային կազմակերպության փորձագետները հայտնել են, որ ծովամթերքի շուկան ուսումնասիրելու ընթացքում գիտնականները բացառել են, որ կորոնավիրուսը կարող էր տարածվել Ուհանի վիրուսաբանության ինստիտուտի լաբորատորիայից: Հետաքննության մանրամասները դեռ հրապարակման ենթակա չեն:
Գերմանիայի տարեցների խնամքի կենտրոններից մեկում առնվազն 14 բնակիչ վարակվել է կորոնավիրուսի բրիտանական շտամով՝ չնայած նախօրեին ստացել են Pfizer ընկերության պատվաստանյութի երկրորդ դեղաչափը։ Բժիշկները հայտնել են, որ վարակվածների կյանքին վտանգ չի սպառնում։
Վրաստանի կառավարության որոշմամբ՝ այսօրվանից Վրաստանի ամբողջ տարածքում, այդ թվում, Թբիլիսիում, Ռուսթավիում և Քութայիսում, վերականգնվել է հասարակական տրանսպորտի աշխատանքը, որը կասեցվել էր երկրում կորոնավիրուսի աճին զուգահեռ: Տրանսպորտի աշխատանքի արգելքն ուժի մեջ կմնա շաբաթ և կիրակի օրերին: Աշխատանքը վերսկսել են նաև Թբիլիսիի մետրոն, ավտոբուսները և երթուղային տաքսիները: Բոլոր տրանսպորտային միջոցներով երթևեկելիս դիմակ կրելը պարտադիր է:
Կորոնավիրուսի համավարակով պայմանավորված՝ առաջին անգամ Վենետիկի հայտնի փառատոնն այս տարի անցկացվել է առցանց: Միջոցառման զգեստները ցուցադրելու համար գործարկվել են հատուկ վիրտուալ սենյակներ: Սուրբ Մարկոսի հրապարակում երեկ ցուցադրվել է մի քանի տասնյակ տոնական հանդերձանք: Կառնավալի հիմնական իրադարձությունները՝ «Հրեշտակի թռիչքը», դիմակահանդեսներն ու բոլոր երթերը, համավարակով պայմանավորված, այս տարի տեղի չեն ունենա:
