Գործադիրը նիստը սկսեց լավ լուրով։ Փետրվարի 1-ից Ռուսաստանը բացում է օդային ճանապարհը, և Հայաստանի քաղաքացիները կկարողանան մուտք գործել Դաշնության տարածք։ Ռուսական կողմի ու ԵԱՏՄ գործընկերների հետ մեկ տարի տևած քննարկումն արդյունք է տվել՝ տեղեկացրեց վարչապետը և ընդգծեց՝ սա կլուծի հատկապես կորոնայի հետևանքով փակված սահմանների պատճառով Ռուսաստան արտագնա աշխատանքի չմեկնած հայաստանցիների խնդիրը։
Օդային ճանապարհով Ռուսաստան մուտք գործելու համար նախ հեռախոսում պետք է ներբեռնել «Ճամփորդի՛ր առանց Covid-19-ի» ծրագիրը։ Ապա դրանում նշված լաբորատորիաներում հանձնել թեստ ու առավելագույնը 72 ժամվա բացասական արդյունքով օդանավ նստել։ Առողջապահության նախարարը բացատրում է՝ թեստի պատասխանը լինելու է էլեկտրոնային ձևով՝ հենց ծրագրում։
Ծրագիրն արդեն գործարկվել է, բայց դեռ փորձնական, մինչև մարտի 1-ը՝ հստակեցրեց վարչապետն ու համոզմունք հայտնեց՝ այն կշարունակի աշխատել, քանի որ նախափորձարկում անցել է։ Սա, ըստ երկրի ղեկավարի, կակտիվացնի օդային հաղորդակցությունն ու արդեն գարնան սկզբին կվերականգնի նախկին ուղևորափոխադրումների ծավալը։
Որոշումը կարևոր է նաև զբոսաշրջային ոլորտի համար՝ ընդգծեց վարչապետը։ Առողջապահության նախարարն էլ հստակեցրեց՝ ավիատոմսերի վաճառքն ազատ է, ծրագրի հետ չփոխկապակցված, միայն գնացողը պետք է ուշադիր լինի, թեստի բացասական պատասխանի համար նախատեսված 72 ժամը չխախտի։
Օրակարգի հարցերից ելնելով՝ նոյեմբերի 18-ի վարչապետի հրապարակած ճանապարհային քարտեզի թիրախներից գործադիրն այսօր որոշեց՝ պատերազում վիրավորված բոլոր անձինք միանվագ կես միլիոն դրամ կստանան։ Սոցիալական հարցերի նախարարի խոսքով՝ շահառուները 6000-ն են, ու որոշումը, բացի զինվորականներից, ժամկետայիններից, տարածվում է նաև աշխարհազորայինների, կամավորների վրա։
Ծրագրից չեն օգտվի միայն պատերազմի հետևանքով առաջին ու երկրորդ կարգի հաշմանդամություն ստացած անձինք. ըստ Առաքելյանի՝ նրանք մոտ 1000-ն են և օրենքով Զինվորների ապահովագրություն հիմնադրամի շահառու են։ 200-ից ավելի քաղաքացի էլ արդեն իսկ ստացել է հաշմանդամության խումբ, ծանր դեպքերից ամպուտացված ու պրոթեզավորման կարիք ունեցողներն էլ չեն գերազանցում 120-ը՝ տեղեկացրեց նախարարը։ Նաև հստակեցրեց նոր որոշումը՝ ոչ մի տեղ այցելելու կարիք չկա, 500 հազարը ստանալու համար դիմումը պետք է ներկայացվի առցանց տարբերակով։
Նախարար Առաքելյանը մեկ այլ փաթեթով էլ առաջարկեց ստեղծել միասնական սոցիալական ծառայությունն ու գործարկել մեկ պատուհանի սկզբունքը։ Գաղափարի հիմքում կարիքների միասնական գնահատումն է լինելու՝ պարզաբանեց նախարարն ու հստակեցրեց՝ սա չի համընկնելու քաղաքացիական ոլորտում մատուցվող ծառայությունների հետ։
Համակարգը ներդրվելու է այս տարվա ապրիլի 1-ից։ Նիկոլ Փաշինյանը նկատում է՝ նպատակը քաղաքացիների համար քաշքշուկը նվազագույնի հասցնելն է, ապագայի համար էլ՝ նույն ծառայությունները թվայնացված դարձնելը։
Որպես օրինակ վարչապետը մատնանշեց արդարադատության նախարարության կազմում գործող քաղաքացիական մեկ պատուհանը։ Նախարար Արշակյանն էլ առաջարկեց օգտագործել «Հայփոստի» ռեսուրսը՝ Հայաստանի տարածքում 850-ից ավելի գրասենյակները։ Առաջարկները շատ էին՝ Փաշինյանը նշեց՝ դրանք պետք է քննարկվեն։ Փոխվարչապետ Ավինյանն էլ նկատեց՝ թվայնացված ծառայությունների անցնելու ժամկետը նախանշվածից ավելի շուտ կլինի։
Տնտեսական թեմաներից՝ ՊԵԿ նախագահն էլ առաջարկեց ներդնել օրինապահ հարկ վճարողին խրախուսող մեխանիզմներ։ Չափորոշիչները կսահմանի Կառավարությունը։ Այն որ տարեցտարի օրինապահ հարկ վճարողի հավաստագիր ստացողների թիվն ավելանում է, փաստում է վիճակագրությունը՝ թվերը մեջբերում է գլխավոր հարկահավաքը։
Վարչապետն ընդգծեց՝ հարկ վճարողները բարձր կարգապահության դրսևորեցին պատերազմի ընթացքում, սա կարևոր ու խոսուն փաստ է։
Կառավարության այսօրվա նիստում Արմեն Ղուլարյանն էլ նշանակվեց Քաղաքաշինության կոմիտեի նախագահ։
