Կառավարության այսօրվա նիստին քննարկվեց Հայաստանի Հանրապետության և Վերակառուցման և զարգացման միջազգային բանկի միջև «Հիվանդությունների կանխարգելման և վերահսկման ծրագրի համար լրացուցիչ ֆինանսավորում» վարկային համաձայնագրի ստորագրման առաջարկությանը հավանություն տալու մասին հարցը:
Առողջապահության նորանշանակ նախարար Անահիտ Ավանեսյանը նշեց, որ նախագծով նախատեսվում է 7.4 միլիոն դոլարի տրամադրում: Դեռևս 2013-ին ՀՀ-ի և Միջազգային զարգացման կազմակերպության միջև ստորագրված համաձայնագրի շրջանակներում 35 միլիոն դոլարին համարժեք միջոցներ են նախատեսվել Գեղարքունիքի մարզի Մարտունի ԲԿ-ի և Վայոց ձորի մարզային հիվանդանոցի արդիականացման համար:
«2020 թվականի մարտին կնքված համաձայնագրի փոփոխություններով նախատեսվել էր, որ Վայոց ձորի նոր մարզային հիվանդանոցի կառուցման և հագեցման աշխատանքները հանվեն վարկային ծրագրից՝ հաշվի առնելով շինարարական աշխատանքների բարձր արժեքը, ինչպես նաև փոխարժեքային տարբերության հետևանքով առաջացած ֆինանսական կորուստները: Նշված պատճառներով վարկային ծրագրի ֆինանսական միջոցները չէին բավարարի երկու ԲԿ-ների արդիականացման համար, դրա համար էլ նպատակահարմար էր այդ պահին միջոցներն ուղղել Մարտունու ԲԿ-ի արդիականացման աշխատանքներին»,- նշեց նախարարը՝ հավելելով, որ Վայոց ձորի նոր ԲԿ-ի կառուցումն ու սարքավորւմներով հագեցումը սահմանվել էին 2019-23 թթ. Կառավարության գործունեության միջոցառումների ծրագրով: Իսկ կորոնավիրուսի համավարակի ընթացքում հնարավորինս արագ արձագանքելու նպատակով հարմար էր տվյալ վարկային միջոցներից 3 միլիոն դոլարի չափով վերաբաշխել և ուղղել Քովիդ-19-ի դեմ պայքարին:
«Արդյունքում՝ առաջացել էր 3 միլիոն դոլարի դեֆիցիտ, և անհրաժեշտություն է առաջացել Մարտունու ԲԿ-ի կառուցումն ամբողջովին ավարտելու համար լրացնել այդ գումարները և, իհարկե, շարունակել Վայոց ձորի ծրագիրը»,- նշեց նախարարը՝ հավելելով, որ Մարտունու ԲԿ-ի շինարարական աշխատանքները կավարտվեն 2022-ի սկզբին, իսկ Վայոց ձորի հիվանդանոցի կառուցումը կմեկնարկի այս տարի:
Ֆինանսների նախարար Ատոմ Ջանջուղազյանն էլ հավելեց, որ ընդհանուր առմամբ վարկի չափն ավելացվում է կոնկրետ ծրագրի համար, բայց վարկային պարտավորությունները չենք ավելացնում, քանի որ այս ավելացումը հնարավոր է եղել առաջնահերթությունների վերանայման ճանապարհով այլ վարկային ծրագրերի նվազեցման հաշվին:
«Այսինքն՝ ընդհանուր պարտավորությունները, որ համաձայնագրով ունեինք, շարունակում է ընդհանուր չափը պահպանվել, փոխարենը՝ մենք վերանայել ենք առաջնահերթությունները»,- նշեց Ջանջուղազյանը:
