Խորհրդարանն այսօր քննարկեց պատգամավորներ Մխիթար Հայրապետյանի, Նիկոլայ Բաղդասարյանի, Նարեկ Զեյնալյանի և Կորյուն Մկրտչյանի ներկայացրած «Տեղական ինքնակառավարման մասին» օրենքում փոփոխությունների փաթեթը:
«Իմ քայլը» խմբակցության պատգամավոր Նիկոլայ Բաղդասարյանը տեղեկացրեց՝ նախագծով համայնքներին իրավուք է վերապահվում արգելել համայնքին պատկանող որոշ տարածքներում տրանսպորտային միջոցների վաճառքի և վարձույթի կազմակերպումը:
«Օրենքի ընդունման դեպքում համայնքի ղեկավարը իրավունք է ստանում դիմել համայնքի ավագանուն, որ ավագանին կայացնի համապատասխան որոշում՝ հաստատելով այն ցանկը, թե որտեղ չի կարելի կազմակերպել տրանսպորտային միջոցների վաճառքը և վարձույթը, և այն հատվածներում, որտեղ արգելված չի լինելու՝ այդ գործունեությունը համայնքը կարող է թույլատրել, կազմակերպել»,- ասաց պատգամավորը:
Բաղդասարյանի խոսքով՝ առաջինից երկորրդ ընթերցում կատարվել են որոշ տեխնիկական և բովանդակային փոփոխություններ՝ սահմանելով, որ համայնքի ղեկավարը դիմում է ավագանուն՝ հաստատելու տվյալ վայրերի ցանկը, որտեղ թույլատրելի կլինի կազմակերպել ավտոմեքենաների վաճառքը և վարձույթը: Հեղինակած փաթեթով առաջարկվում է լուծել մայթեզրերին տրանսպորտային միջոցների վաճառքի ու վարձույթի խնդիրը:
Սահմանվել է օրենքի ուժի մեջ մտնելու ժամկետ՝ 2021 թվականի հունիսի 1-ը:
