Ճապոնիայի արտաքին գործերի և պաշտպանության նախարարությունների նախկին ղեկավար Տարո Կոնոն, ով այժմ վարչական բարեփոխումների իրականացման համար պատասխանատու նախարար է, կղեկավարի նաև երկրի բնակիչներին կորոնավիրուսից պատվաստելու գործընթացը: Այս մասին երկուշաբթի լրագրողներին հայտնել է վարչապետ Յոշիհիդե Սուգան:
Վարչապետը նաև նշել է, որ «հնարավորության դեպքում պատվաստումը կսկսվի մինչև փետրվարի վերջ», տեղեկացնում է ТАСС-ը:
Առաջին փուլում կպատվաստվի Ճապոնիայի մոտ 50 միլիոն քաղաքացի: Նախ դրանք կլինեն բժշկական և սոցիալական ոլորտի մոտ 4 միլիոն աշխատողներ, որոնք առավել հաճախ են շփվում հիվանդ մարդկանց հետ: Երկրորդը կպատվաստվեն 65 տարեկանից բարձր մարդիկ՝ մոտ 36 միլիոն մարդ: Դրանից հետո պատվաստումը կտարածվի 8,2 միլիոն քաղաքացու վրա, որոնք ունեն քրոնիկ հիվանդություններ:
Կառավարության կողմից Pfizer- ի պատվաստանյութը հաստատվելու դեպքում, այն կլինի Ճապոնիայում թույլատրված առաջին կորոնավիրուսային պատվաստանյութը: Դեկտեմբերի սկզբին Ճապոնիայի իշխանությունները օրենք ընդունեցին COVID-19- ից երկրի բոլոր բնակիչների անվճար պատվաստումների մասին:
